Ֆրանսիայի նախագահ Նիկոլա Սարկոզին և Մեծ Բրիտանիայի վարչապետ Դևիդ Քեմերոնը նախօրեին դիմել են լիբիացիներին` կոչ անելով պատրաստվել նոր դարաշրջանի՝ առանց Մուամար Քադաֆիի: Նրանք նշել են, որ Քադաֆին անհապաղ պետք է հեռանա, նրա կողմնակիցներին կոչ են արել հրաժարվել Քադաֆիին աջակցելուց, քանի դեռ ուշ չէ, իսկ հակառակորդներին` միանալ իշխանափոխության գործընթացին:
Նրանք նաև նշել են, որ այսօր Լոնդոնում տեղի է ունենալու միջազգային հանրության ներկայացուցիչների կոնֆերանս (ի դեպ, Ռուսաստանից այստեղ ոչ ոք հրավիրված չէ), որտեղ քննարկվելու է Լիբիային ապագան ժողովրդի կողմից իշխանափոխություն իրականացնելուց հետո: Այս մասին հաղորդում է BBC-ն:
Այս հայտարարությունից անմիջապես հետո Լիբիայի արտաքին գործերի նախարարի տեղակալ Խալիդ Քայիմը հայտարարել է, որ Լոնդոնի կոնֆերանսի մասնակիցները պետք է զերծ մնան Լիբիայում քաղաքացիական պատերազմ հրահրելուց, նրանք պետք է լինեն խաղաղապահ, այլ ոչ թե պատերազմի սադրիչ: «Միայն Լիբիայի ժողովուրդն իրավունք ունի ընտրելու իր ապագան»,- ասել է փոխարտգործնախարարը:
Միաժամանակ միջազգային հանրությունը սկսում է եզրեր փնտրել և մշակել ձևաչափեր, որոնցով կարող է համագործակցել Լիբիայի ընդդիմության հետ: Նախօրեին Քաթարը պաշտոնապես հայտարարել էր, որ ճանաչում է Լիբիայի ընդդիմադիր կառավարությունը Բենղազիում:
ԱՄՆ ֆինանսների նախարարությունը ընդդիմադիրների պայքարը հեշտացնելու և լրացուցիչ ռեսուրսներ ներգրավելու համար հայտարարել է, որ պատժամիջոցները չեն վերաբերում Լիբիայի ապստամբներին, քանի որ վերջիններս Քադաֆիի կառավարության մաս չեն կազմում: Հետևաբար, նրանք կարող են առանց որևէ խոչընդոտների նավթ և նավթամթերք վաճառել` դրանով ստանալով պայքարի համար լրացուցիչ միջոցներ ներգրավելու հնարավորություն:
Քադաֆիի կառավարությունը, սակայն, հետ չի մնում քարոզչական պատերազմում: Երեկ Լիբիայի պետական հեռուստատեսությամբ ցուցադրել են Մուամար Քադաֆիի որդիներից մեկին` Խամիսին, որին անցած ուրբաթ որոշ լրատվամիջոցներ «ուղարկել էին այն աշխարհ»: Այս մասին հաղորդում է Reuters գործակալությունը: Ռեպորտաժում նաև կոչ է արվել շարունակել պայքարը օտարերկրյա նվաճողների դեմ:
