Այսօր Ազգային ժողովում տեղի է ունեցել ԱԺ Էթիկայի հանձնաժողովի նիստ, որտեղ քննարկվել է ԱԺ նախագահ Հովիկ Աբրահամյանին դիմելու հարցը` կապված Դաշնակցություն խմբակցության ղեկավար Արմեն Ռուստամյանի` հանձնաժողովին ուղղված դիմումի հետ: Այդ մասին այսօր «Առաջին լրատվական»-ի հետ զրույցում ասաց հանձնաժողովի դաշնակցական անդամ Արծվիկ Մինասյանը:
Հիշեցնենք, որ Ա. Ռուստամյանը դիմել էր էթիկայի հանձնաժողովին` իշխանական խմբակցությունների կողմից ընդդիմության հրավիրած արտահերթ նիստը տապալելու հարցը քննարկելու համար: Եվ այսօր հանձնաժողովը որոշել է դիմել Հ. Աբրահամյանին` պարզելու, թե նիստից բացակայող 83 պատգամավորներն ինչու չէին ներկայացել ԱԺ: Ա. Մինասյանի խոսքերով` ինքը և հանձնաժողովում այդ հարցով ներկայացուցիչ, «Ժառանգություն» խմբակցության անդամ Զարուհի Փոստանջյանը առաջիկայում վերջնական տեսքի կբերեն այդ դիմումը, և այն ԱԺ նախագահին կփոխանցվի հավանաբար եկող շաբաթ:
Օրեր առաջ նույն հարցը քննարկելիս վիճաբանել են հանձնաժողովի նախագահ, ՀԱԿ խմբակցության անդամ Նիկոլ Փաշինյանն ու հանձնաժողովի և ՀՀԿ խմբակցության անդամ Դավիթ Հարությունյանը: Հետաքրքրվեցինք` արդյոք այս անգամ նման միջադեպ չի՞ եղել, սակայն Ա. Մինասյանը չցանկացավ մանրամասնել հանձնաժողովի ներքին քննարկումները, միայն ավելացրեց. «Դա հանձնաժողովի ներքին խոհանոցն է, չեմ ուզում մանրամասնել: Միայն կասեմ, որ, իհարկե, պարոն Հարությունյանը նորից փորձեց առարկել, բայց այդ առարկությունը հանձնաժողովի մեծամասնության կողմից չընդունվեց»,- ավելացրեց Ա. Մինասյանը:
Էթիկայի հանձնաժողովն այսօր քննարկել և իր կանոնակարգի համաձայն` քննությունը սկսված է համարել նաև «Բարգավաճ Հայաստան» խմբակցության անդամ Միքայել Մելքումյանին վերաբերող՝ «Ռազմավարական մշակումների կենտրոն» հասարակական կազմակերպության դիմումը:
Հիշեցնենք, որ օրեր առաջ մամուլում սկանդալային ձայնագրություն հրապարակվեց, որտեղ Մ. Մելքումյանը ինչ-որ մեկին ասում էր, որ ինքը խոշոր սեփականատեր է: Եվ նրա զրուցակիցը պատգամավորի հետ խոսում էր իրեն պատկանող տարածքները վարձակալության վերցնելու, գնային հարցեր ճշտելու մասին:
«Այս հարցով որոշում կայացվեց, որպես հանձնաժողովի ներկայացուցիչ, հաստատել իմ թեկնածությունը: Ես դիմումի քննության ընթացքում աշխատելու եմ հանձնաժողովի որոշումը պատրաստելու, փաստեր հավաքագրելու, ապացույցներ ներգրավելու վրա, որպեսզի հանձնաժողովի որոշման վերջնական նախագիծ ներկայացվի»,- ասաց Ա. Մինասյանը:
