Քննիչները կասեցրել են բնապահպան Սուրեն Ղազարյանի դեմ հարուցված քրեական գործի հետաքննությունը` կապված հետախուզման հետ: Այս մասին հայտնում է RIA Novosti-ն՝ հղում անելով ՌԴ Քննչական կոմիտեի Կրասնոդարի երկրամասի Գլխավոր քննչական վարչության պաշտոնական ներկայացուցիչ Իվան Սենգերովին:
«Դատախազության որոշմամբ գործը փոխանցվել է Քննչական կոմիտե: Ներկայում գործի հետաքննությունը դադարեցվել է՝ կապված կասկածյալի հետախուզման հետ»,-ասել է գործակալության զրուցակիցը:
Ավելի վաղ Ղազարյանը իր բլոգում հայտնել էր, որ իր դեմ դաշնային հետախուզում է հայտարարվել: Այսօր միջազգային իրավապաշտպան Human Rights Watch կազմակերպության հաղորդագրության համաձայն՝ հայտնի է դարձել, որ բնապահպանն իբր լքել է երկիրը և ներկայում փորձում է ապաստան ստանալ եվրոպական երկրում:
Սենգերովը հստակեցրել է, որ կասկածյալի գտնվելու վայրը ներկայում հայտնի չէ: Նա հավելել է, որ Ղազարյանի դեմ դեռևս մեղադրանք չի առաջադրվել և նրա նկատմամբ խափանման միջոց դեռևս չի ընտրվել: Կասկածյալի դեմ հետախուզում է հայտարարվել նոյեմբերի 16-ին:
Ղազարյանի փաստաբան Մարինա Դուբրովինան կայքին փոխանցել է, որ իր տեղեկություններով՝ բնապահանն իսկապես դուրս է եկել Ռուսաստանի սահմաններից: Նա հայտարարել է, որ տեղյակ չէ` որ երկրում է գտնվում իր պաշտպանյալը:
Փաստաբանի խոսքով՝ բնապահպանը մտավախություն է ունեցել, որ իր դեմ երկրորդ քրեական գործի հարուցումը կհանգեցնի ազատազրկման իրական ժամկետի սահմանման:
«Նա օրենքին հակասող ոչինչ չի արել, ինչի համար կարելի կլիներ իրական ժամկետ ստանալ, հավանաբար դա ցանկացած մարդու համար թաքնվելու առիթ է»,- ասել է փաստաբանը:
Ավելի վաղ հաղորդվել էր, որ ոստիկանությունը քրեական գործ է հարուցել Կրասնոդարի երկրամասի հայտնի բնապահպան Սուրեն Ղազարյանի դեմ: Բնության պաշտպանին սպառնում է պատիժ՝ սպանության սպառնալիքի հոդվածով: Ղազարյանը մեղքը չի ճանաչում:
Նրա խոսքով՝ 2012-ի օգոստոսի 2-ին Գելենջիկի շրջանում իր և մասնավոր օբյեկտի անվտանգության աշխատակիցների միջև վեճ է տեղի ունեցել, որից հետո անվտանգության աշխատակիցներից մեկը հայտարարություն է գրել ոստիկանությունում սպանության սպառնալիքի մասին:
Նախկինում Ղազարյանը դատապարտվել էր 3 տարվա պայմանական ազատազրկման: Քննության վարկածով՝ նա իր բնապահպան ընկերոջ՝ Եվգենի Վիտիշկոյի հետ 2011-ի նոյեմբերին վիրավորական գրություններ էր թողել Կրասնոդարի անտառներից մեկի ցանկապատի վրա: Բնապահպանները հաստատում են, որ գրությունները նրանք թողել են Կուբանի ղեկավար Ալեքսանդր Տկաչևի հողատարածքի ցանկապատին:
Նրանց խոսքով՝ անտառի այդ հատվածը վերցվել էր ապօրինաբար և այնտեղ սոճիներ էին հատվում, որոնք գրանցված են Կարմիր գրքում: Տարածաշրջանի վարչակազմի մամլո ծառայությունը հերքել էր վկայությունն այն մասին, որ այդ քոթեջը և հողակտորը պատկանում են Կրասնոդարի երկրամասի ղեկավարին:
