Associated Press-ի փոխանցմամբ, երեկ մամուլի ասուլիսի ժամանակ ԱՄՆ նախագահ Բարաք Օբաման հայտարարել է, որ ԱՄՆ քաղաքացիները հիասթափված են տնտեսական բարեփոխումների տեմպերից, եւ որ ինքն ամբողջ պատասխանատվությունը վերցնում է իր վրա:
Նա նաեւ հայտնել է, որ պատրաստ է բոլոր շահագրգիռ ուժերի հետ բանակցություններ վարել եւ տարբերակներ փնտրել համատեղ աշխատանքի համար: «Հեշտ չի լինելու»,- նշել է Օբաման` պարզաբանելով, որ մի շարք հարցերում Դեմոկրատական եւ Հանրապետական կուսակցությունները ունեն տարբեր կարծիքներ:
Օբամայի կարծիքով, իրեն չի հաջողվել ճիշտ վերաբերմունք ձեւավորել բիզնեսի նկատմամբ: Նրա կարծիքով, շատ կարեւոր է ճիշտ վերաբերմունք ձեւավորելը, ինչը թույլ կտա ազդել մասնավոր ներդրումների ապահովման վրա: Հենց դա նրան չի հաջողվել այս երկու տարվա ընթացքում:
CNN-ի հաղորդած վերջին տվյալներով, դեմոկրատները Ներկայացուցիչների պալատում ստացել են 183 տեղ, հանրապետականները` 239: Իսկ Սենատում այդ հարաբերակցությունն է 51 ընդդեմ 47-ի ` հօգուտ դեմոկրատների: Սա նշանակում է, որ Օբաման շատ լուրջ խնդիրներ է ունենալու նոր օրինագծերի անցկացման հարցում, եւ մեծ բարեփոխումները կասկածի տակ են:
