«Ժառանգություն» կուսակցության կազմակերպած սահմանադրական փոփոխությունների թեմայով խորհրդաժողովում հնչած ելույթների շարքում բավականին հետաքրքրական էր ԲՀԿ-ական Վահան Բաբայանի ելույթը: Հետաքրքիր էին, իհարկե, ոչ թե ելույթի բովանդակությունը, շոշափված խնդիրները, շարահյուսությունը, հռետորաբանությունը կամ գեղարվեստական պատկերավորությունը, այլ արտահայտված մի միտք, թե՝ ԲՀԿ-ն դեմ է առճակատմանը և կողմ է համերաշխությանը, ու եթե իշխանությունները համերաշխության ճանապարհով գնան, ապա շատ հարցեր կլուծվեն:
Ինչո՞ւ է հետաքրքրական այս «թեզը»: Որովհետև այն առաջ է քաշում ԲՀԿ-ն և հատկապես՝ Վահան Բաբայանը՝ այն Բաբայանը, որ ԲՀԿ-ն ներկայացնելով խորհրդարանական ապրիլյան ճեպազրույցներից մեկում՝ հայտարարել էր, որ եթե հեռացած Տիգրան Սարգսյանի փոխարեն նշանակվի նորից ՀՀԿ-ական, ապա իրենք հարյուր հազարներով փողոց դուրս կգան և նոր ՀՀԿ-ական վարչապետի չեն ընդունի: Ավելորդ է երևի թե ասել, որ ԲՀԿ-ի ճեպազրույցների ժամին կուսակցության անունից ներկայացող մարդը չէր կարող նման հայտարարություններ անել առանց նախապես դրանք կուսակցության հետ համաձայնեցրած լինելու:
Ուստի հետաքրքրական է, որ ՀՀԿ-ական վարչապետ չհանդուրժելու մասին հայտարարող Վահան Բաբայանը այսօր հայտարարում է համերաշխություն ակնկալելու մասին: Բայց չէ՞ որ նշանակված վարչապետը ՀՀԿ-ական էր, և նրա արդյունքներն էլ կարծես թե մի քանի ամիս հետո առանձնապես տպավորիչ չեն, ավելին՝ այդ արդյունքները, մեղմ ասած, անմխիթար են, միևնույն ժամանակ էլ՝ ոչ իշխանական քառյակի 12 կետերն են անկատար: Ուրեմն ինչո՞ւ ԲՀԿ-ն ոչ միայն հանդուրժեց ՀՀԿ-ական նոր վարչապետի նշանակումը, ոչ միայն այսօր վարչապետի հրաժարական պահանջելու փոխարեն պատրաստվում է ընդամենը ոստիկանապետի հրաժարական պահանջել, այլև, ըստ էության, իշխանություններից էլ համերաշխություն է ակնկալում:
Համերաշխությունը հետաքրքրական գաղափար է, սակայն գաղափար լինելուց բացի՝ այն ներքաղաքական բանաձև է Հովիկ Աբրահամյանի համար: Գաղտնիք չէ, որ Աբրահամյանի, այսպես ասած, ներիշխանական կրեդոն արդեն երկար տարիներ ՀՀԿ-ի և ԲՀԿ-ի համերաշխությունն ապահովելն է: Եվ երբ այսօր ԲՀԿ-ականը խոսում է համերաշխություն ակնկալելու մասին, կարծես թե բավական պարզ է դառնում, թե ինչ բանաձև է դրվում շրջանառության մեջ կամ ավելի ճիշտ՝ ինչ առաջարկ:
ԲՀԿ-ն, ըստ էության, ՀՀԿ-ականներին առաջարկում է պայմանավորվել, եթե հիմքում համերաշխությունն է, այսինքն՝ Հովիկ Աբրահամյանի ներիշխանական դերի բարձրացումը, որը ԲՀԿ-ի համար, բնականաբար, շոշափելի երաշխիք է՝ հաշվի առնելով Ծառուկյանի և Աբրահամյանի միջև խնամիական կապը, ինչը հայաստանյան տիպի, այսպես ասած, վաղ ֆեոդալական ավանդույթներով ու արժեքներով առաջնորդվող «էլիտաների» պարագայում քաղաքական և իրավական երաշխիքներից ավելի ամուր և հաստատուն երաշխիք է:
Ուշագրավն այն է, որ այս բանաձև-առաջարկը ըստ էության առաջ է քաշվում ոչ իշխանական քառյակի միասնական հանրահավաքին ընդառաջ, այսինքն՝ հանրահավաքի օրվա հայտարարությանն ընդառաջ, նախօրեին:
Հիշեցնենք, որ այսօր քառյակը հավաքվում է՝ հանրահավաքի օրը և օրակարգը որոշելու, և ըստ էության այստեղ շատ բան կախված է լինելու նրանից, թե ինչ արձագանք ստացած կլինի ԲՀԿ-ն համերաշխության մասին իշխանություններին արած առաջարկի վերաբերյալ:
