Արձագանքելով ոստիկանության Արմավիրի վարչության պետ Տիգրան Եսայանի այն դիտարկմանը, որ ոստիկանները քաղաքապետի թեկնածու Սևակ Մինասյանին չեն հարվածել, հակառակ դեպքում քաղաքապետի թեկնածուն այդ մասին ոստիկանությունում հաղորդում կտար` Սևակ Մինասյանի վստահված անձ Սարգիս Ցականյանը արձագանքեց.
«Եթե կաշառք բաժանողին հայտնաբերել ենք և ներկայացրել ոստիկանություն ու արդյունքում մեր դեմ են ցանկանում քրեական գործ հարուցել, ինչ կլինի, երբ Սևակ Մինասյանը ասի, որ իրեն ոստիկանապետը հարվածել է։ Պարզապես գործ կսարքեն ոստիկանությանը դիմադրելու մեղադրանքով։ Իսկ քրեական գործերով ցանկանում են մեզ լռեցնել»։
Ի դեպ, նրանից տեղեկացանք, որ ընտրությունների ընթացքում ընտրակաշառքը արձանագրած և առևանգման մեղադրանք վաստակած քիքբոքսինգի միջազգային մրցաշարերի հաղթող, Քիքբոքսինգի ազգային ֆեդերացիայի անդամ, մարզիչ Անուշավան Ալեքսանյանի 72 ժամը ոստիկանությունում լրանալուց հետո խափանման միջոց է ընտրվել կալանքը։
