«Ավտովարորդների պաշտպանության լիգա» կազմակերպության անդամները և անհատ տաքսիստներն այսօր նորից բարձրացրին իրենց խնդիրները` կապված տեսախցիկների նկարահանման, կայանատեղերի բացակայության, տուգանքների աճի հետ:
Լիգայի նախագահ Տիգրան Հովհաննիսյանը տեղեկացրեց, որ հանդիպել են փոխոստիկանապետին, ՃՈ պետին, ինչպես նաև «Սեքյուրիթի դրիմի» հիմնադրին: Ոստիկանությունն առաջարկել է բանակցություններ վարել վարորդների հետ, խնդիրներին լուծում տալ: Վարորդների ներկայացրած փաթեթը ամբողջովին ընդունվել է՝ տաքսիստներին չտուգանել կայանատեղի չլինելու դեպքում, կանգառներում գիշերը ժամը 12-ից հետո կանգնելու դեպքում:
Ընկերության հիմնադիրը խոստացավ քաղաքապետարանին դեղին գծանշանների համար գումար հատկացնել՝ տասը միլիոն դրամ: Բացի այդ, վարորդները առաջարկել են էլեկտրոնային կայք հիմնել, որը կապահովի ոստիկան-վարորդ կապը:
ՃՈ-ի հետ հանձնախումբ է ստեղծվել, որն ամեն շաբաթ տուգանքի վերաբերյալ հանդիպում է կազմակերպելու: Ի դեպ, վերջին փոփոխությունից հետո տուգանքի չափը եռապատիկից քսանհինգ տոկոս դարձավ: Այս կապակցությամբ «Սեքյուրիթի դրիմը» հայտարարել է, որ սա խփում է ընկերության գրպանին, որ այլևս չի համագործակցում, որ հրաժարվում է բոլոր խոստումներից:
«Մենք հասկացանք, որ մարդը իր ջեբի մասին ա մտածում, մեր պահանջն է ամբողջովին պետականացնել, թող սեփականատերը հանձնի իր բաժնետոմսերը, թող այն լինի պետական, քանի որ մինչև հիմա փակ է նրանց ճանապարհը, քանի որ կա սեփականատեր: Բաժնետոմսերը պետականացրու, հեռացիր բիզնեսից, բոլոր ծանուցումները համարում եմ փամփուշտ, դիվերսիա ժողովրդի հանդեպ»,- ասաց Տիգրան Հովհաննիսյանը:
Հիմա վարորդները պահանջում են պետականացնել ոլորտը: Նրանք կոչ արեցին «Սեյքուրիթի դրիմին» հեռանալ այս բիզնեսից: «Պահանջի ժամանակահատվածը մինչև հոկտեմբերի քսանչորսն է, մենք դիմելու ենք քաղաքական և հասարակական կազմակերպություններին, բոլորին դիմելու ենք, նաև՝ կռված տղերքին, մի՞թե կարելի է նման բան: Սեփականատերը պետք է դուրս գա»,- ասացին վարորդները:
Այսօրվա հայտարարությունից հետո գրություն կուղարկվի նախագահին, վարչապետին՝ համապատասխան պահանջով:
«Տրամաբանորեն, ենթադրենք, խախտում եմ արել, ես ինչու եմ խախտում անելու համար հարստացնում ինչ-որ մեկին, թող ինձ պետությունը տուգանի, թող այդ տուգանքը պետության համար օգտագործվի, ոչ թե ինչ-որ մեկի: Վարորդը կամա թե ակամա խախտում անել չի կարող: Մինիմալ տուգանքների չափն իջացրել են, մաքսիմալը` եռապատկել են»,- ասացին վարորդները:
Տիգրան Հովհաննիսյանը նշեց՝ եթե այսպիսի քաղաքականությունը շարունակվի, իրենք կդիմեն այլ քայլերի, գործադուլ կանեն, կդիմեն այլ միջոցների:
