Ֆրանսիական ուլտրաաջերի «Ազգային ճակատ» կուսակցությունը մի քայլի վրա է գտնվում իշխանությունից, հայտարարել է վարչապետ Մանուել Վալսը։ Այս մասին տեղեկացնում է BBC -ի ռուսական ծառայությունը։
Ըստ վերջերս անցկացված սոցիոլոգիական հարցման՝ «Ազգային ճակատի» առաջնորդ Մարին Լե Պենը հանրաճանաչ լինելով առաջ է անցել երկրի ներկայիս նախագահ Ֆրանսուա Օլանդից։
Վալսի խոսքով՝ Ֆրանսիայում սոցիալիստների ներկայիս կառավարությանը անհրաժեշտ է փոխել իր գործողությունների մարտավարությունը, որպեսզի կասեցնի ծայրահեղ աջերի իշխանության գալու սպառնալիքը։
«Ես՝ որպես ձախ հայացքների տեր մարդ, երբեք չեմ կարող դա թույլ տալ,- ասել է Ֆրանսիայի վարչապետը,- որովհետև նման ելքի դեպքում առաջին հերթին տուժելու են ամենաընչազուրկները»։
«Դա սարսափելի, իսկ գուցեև մահացու հարված կլինի Եվրոպայի համար»,- հավելել է նա։
Ֆրանսիայում հաջորդ նախագահական ընտրությունները տեղի են ունենալու 2017 թվականին։
