Ըստ RIA Novosti գործակալության փոխանցման՝ Իրանի իշխանությունները նշանակել են հաջորդ՝ երկրում թվով 11-րդ նախագահական ընտրությունների օրը, որոնք պետք է տեղի ունենան 2013թ. հունիսի 14-ին: Այս մասին հայտնել է երկրի ներքին գործերի նախարար Մոստաֆա Մոհամմեդ Նաջարան:
Իրանի ներքին գործերի նախարարի խոսքով՝ նախագահական ընտրություններին զուգահեռ երկրում տեղի կունենան նաև քաղաքային խորհրդի ընտրությունները, որոնք 4-րդն են երկրի համար:
Ինչպես նշվում է հաղորդագրության մեջ, ներկայում Իրանի Իսլամական Հանրապետության խորհրդարանը դիտարկում է նախագահական ընտրությունների մասին օրենքում փոփոխություններ կատարելու հնարավորությունը: Եթե խորհրդարանականներն ընդունեն այդ փոփոխությունները, դրանք արդեն ուժի մեջ կմտնեն հաջորդ ընտրություններին:
Համաձայն Իսլամական Հանրապետության օրենսդրության` նախագահը, որը չի հանդիսանում պետության փաստացի ղեկավարը, ընտրվում է 4 տարի ժամկետով, նա այդ պաշտոնը չի կարող զբաղեցնել ավելի քան երկու ժամկետ:
Իրանի ղեկավարն է ցմահ ընտրված հոգևոր առաջնորդը՝ ներկայիս այաթոլլա Ալի Խամենեին:
