ԱՄՆ-ի Օրեգոն Սիթի քաղաքում օրերս ութամյա տղայի և ամենավտանգավոր ցեղատեսակի շան մասնակցությամբ մի զարմանալի պատմություն է տեղի ունեցել: Փոքրիկ Ջեսի Քոուլը մյուս երեխաների հետ խաղացել է գետի մոտ, երբ նրանցից մեկը դիպչել է մեղուների փեթակին: Բոլորը միանգամից փախել են, իսկ Ջեսին հապաղել է: Մեղուները նրան հասցրել են խայթել առնվազն 24 անգամ:
Բարեբախտաբար այդ պահին վրա է հասել Աիդ անունով ամերիկյան փիթբուլը, որը, տեսնելով խոտերի վրա ընկած երեխային, տուն է քարշ տվել: «Աիդը տեսավ, թե ինչ է կատարվում, և ինձ տարավ այնտեղից: Նա ինձ մորս մոտ բերեց»,- երեխայի խոսքերն է մեջբերում The Huffington Post-ը:
Նշվում է, որ փիթբուլը երեխայի տաբատից է քաշ տվել: Ջեսին և նրա 14-ամյա քույրը, ովքեր մեղվի խայթոցից ալերգիա ունեն, հիվանդանոց են տեղափոխվել: Սակայն, մի քանի ժամ անց, երբ բժիշկները հանել են բոլոր խայթերը, երեխաներին տուն են ուղարկել:
