Թուրքական Yeni Şafak թերթի փոխանցմամբ, ՆԱՏՕ-ն որոշել է 16 ռազմանավից բաղկացած մի նավատորմ ուղարկել լիբիական ջրեր, որն ի կատար կածի Լիբիան ծովային շրջափակման ենթարկելու ՄԱԿ ԱԽ որոշումը: Այդ ռազմանավերից 5-ը թուրքական են (4 ֆրեգատ և 1 օժանդակ նավ): Բացի այդ, Թուրքիան տրամադրել է 1 սուզանավ:
Թերթն ընդգծում է, որ ծովային շրջափակման հարցում ամենամեծ դերը փաստորեն վստահվել է Թուրքիային` չնայած որ նավատորմի հրամանատարությունն ու վերահսկողությունը հանձնարարվել է Իտալիային (նախկինում Լիբիան հանդիսացել է այս երկու երկրների գաղութն ու կռվախնձորը` «Տրիպոլիտանյան» պատերազմ (1911-1912) ):
Միջազգային նավատորմիղում ֆրեգատներ ունեն նաև Կանադան, Իսպանիան, Մեծ Բրիտանիան, Հունաստանը, Իտալիան և ԱՄՆ-ը: Մյուս երկու սուզանավերը պատկանում են Իսպանիային ու Իտալիային: Վերջինս, Թուրքիայի նման, տրամադրել է նաև 1 օժանդակ նավ:
Հիշեցնենք, որ Թուրքիայի վարչապետ Էրդողանը երեկ հայտարարել էր, որ Թուրքիան երբեք զենք չի ուղղի Լիբիայի ժողովրդի դեմ (կարծես թե, նախկինում այդպես չի վարվել):
Ի դեպ, լիբիական առաջնորդ Մուամար Քադաֆին օրեր առաջ հայտարարել էր, որ թուրքերն իրենց եղբայրներն են, իրենք դարերով միասին են ապրել և իրենք բոլորն օսմանցիներ են:
