Այսօր լրագրողների հետ հանդիպման ընթացքում ՀԱԿ անդամ Գուրգեն Եղիազարյանը պատասխանելով այն հարցին, թե դեռ ինչքա՞ն պետք է հասարակությունը սպասի նախագահական ընտրությունների հետ կապված ՀԱԿ-ի որոշմանը, ասաց. «ՀԱԿ-ը երկու շաբաթից կհայտարարի իր որոշման մասին: Իսկ միասնական թեկնածու ձևակերպումը սխալ է, դա իշխանության ձևակերպումն է: Ասեմ իմանաք. նախագահականին կգնանք միասնական ծրագրով, և հարյուր տոկոսով սրանց կուղարկենք (մատնանշում է ասուլիսին ներկա ՀՀԿ-ական Սուքիաս Ավետիսյանին)»:
Անդրադառնալով Մարտի 1-ի մշտական հանձնաժողով ստեղծելու հարցի հետաձգմանը` Գ. Եղիազարյանը, դիմելով Ս. Ավետիսյանին, ասաց.
«Դուք վախենում եք Մարտի 1-ի բացահայտումից, որովհետև դրա ետևում դուք եք կանգնած, որովհետև մեկ միլիոնից ավելի ժողովրդին դուք եք մղում արտագաղթի:
Ի՞նչ է նշանակում` հետաձգենք Մարտի 1-ի մշտական հանձնաժողով ստեղծելը մեկ տարով: 4 ու կես տարի անվտանգություն, ոստիկանություն ունեցող իշխանությունը ոչ մի բան չի բացահայտել, մեկ տարո՞ւց պետք է բացահայտի: Իսկ ինչ վերաբերում է հետաձգելու հետ կապված Գագիկ Ջհանգիրյանի համաձայնությանը, ապա ասեմ հետևյալը՝ նա հիմա ուզում է որոշ փաստեր ֆիքսել»:
Լրագրողների այն դիտարկմանը, թե Մարտի 1-ի համար նույնքան մեղավոր էր Լևոն Տեր- Պետրոսյանը, որովհետև տանից դուրս չեկավ, Գ. Եղիազարյանը հակադարձեց.
«Մարտի 1-ը կազմակերպել և իրականացրել է Ռոբերտ Քոչարյանը: Նրա հանցագործ ոհմակը հայտարարել էր՝ տանից դուրս գաս, կխփենք: Լևոն Տեր-Պետրոսյանը ո՞նց դուրս գար, եթե փաստացի կալանքի տակ էր: Զինված սրիկաներն ավտոմատներով նրա տան բակում լցված` սպառնում էին սպանել առաջին նախագահին, ինչպե՞ս դուրս գար:
Հենց իշխանափոխություն եղավ, ես ձեզ խոստանում եմ` մեկ շաբաթից Մարտի մեկի բոլոր պատասխանատուները կկալանավորվեն»:
