ԵՄ առանցքային երկրները ողջունում են Հայաստանին ասոցացնելու գաղափարը: «Առաջին լրատվական»-ի հետ զրույցում այս մասին ասաց «Հայաստանի եվրոպացի բարեկամներ» (ՀԵԲ) միջազգային հասարակական կազմակերպության ղեկավար Էդուարդո Լորենցո Օչոան՝ անդրադառնալով Հայաստան-ԵՄ հարաբերությունների ներկա փուլին:
Անդրադառնալով Հայաստանի նոր կառավարության աշխատանքին այս ուղղությամբ՝ նա նշեց, որ ԵՄ անդամ երկրներում ցանկացած նոր կառավարություն ունի 100 օր ժամանակ, ուստի դեռ վաղ է գնահատել ՀՀ կառավարության գործունեությունը հատկապես ԵՄ-Հայաստան հարաբերությունների ոլորտում: Ըստ նրա՝ կարևոր է հաշվի առնել այն հանգամանքը, որ Եվրոպական խորհրդարանն է վերընտրվել, և շուտով Եվրոպական հանձնաժողովն ու Եվրոպական արտաքին գործերի ծառայությունը ևս կթարմանան. պետք է սպասել, որ ԵՄ ապագա գործընկերներն անցնեն իրենց աշխատանքին:
Խոսելով հայաստանյան արտաքին եվրասիական հանձնառությունների, Հայաստանի եվրասիական ինտեգրացման ձգձգման ու Եվրոպական միության հետ քաղաքական հարաբերությունները խորացնելու հնարավորությունների մասին՝ նա ասաց, որ եթե նույնիսկ ՀՀ-ը, ինչպես հայտարարվել էր, միանա Ռուսաստանի կողմից ղեկավարվող պրոյեկտներին, ապա Հայաստան-ԵՄ գործող համագործակցության մեծ հատվածն ուղղակիորեն առևտրի ոլորտին չէ, որ վերաբերում է։ Այնուամենայնիվ պարզ է, որ դա բավարար է պահպանելու և զարգացնելու ՀՀ-ԵՄ բարձր մակարդակի համագործակցություն, եթե կա դա անելու ուժեղ քաղաքական կամք:
«Կախված այդ համագործակցության բովանդակությունից, ինչպես կողմերը ամրագրեցին Վիլնյուսում, առանցքը պետք է լինի ժողովրդավարական ինստիտուտների և դատական համակարգի բարեփոխումները, մարդու իրավունքների և օրենքի գերակայության ապահովումը, լավ կառավարությունը, կոռուպցիայի դեմ պայքարը և քաղաքացիական հասարակության ուժեղացումը: Մասնավորապես այն կարող է ներառել ԱՀ երեք կամ չորս բաժիններ (բացի DCFTA-ից), որը Հայաստանն ու ԵՄ-ն ավարտին են հասցրել 2013 թ. հուլիսին՝ Ընդհանուր արտաքին և անվտանգության քաղաքականություն, Արդարադատություն և ներքին գործեր, հարցեր, որոնք ներառում են շրջակա միջավայրը, գիտությունը, կրթությունն ու փոխադրումը: Սա կապահովի այս ամենի շուրջ ինստիտուցիոնալիզացված երկխոսության ավելի հստակ հանձնառություն: Այն կարող է նաև ընդլայնել համագործակցությունն արտաքին ու անվտանգության քաղաքականության ոլորտում՝ տարածաշրջանային հարցերի վրա հստակ կենտրոնացմամբ»,- ասաց Էդուարդո Օչոան՝ հավելելով, որ ներկայիս փաթեթն ընդգրկում է նաև ոլորտային համագործակցություն, խորացված տնտեսական ու բիզնես հարաբերություններ:
Ըստ նրա՝ ԵՄ-ում մեծ կոնսենսուս կա Արևելյան գործընկերության վերաբերյալ. ԵՄ-ն պետք է ապահովի յուրաքանչյուր երկրի համար հարմար հատուկ մոտեցում ծրագրային մյուս փուլում: «Հայաստանի Հանրապետության դեպքում ԵՄ առանցքային երկրներ և Եվրոպական խորհրդարանում տարբեր հեղինակավոր ձայներ ողջունում են Հայաստանին այնպիսի Ասոցացման համաձայնագիր առաջարկելու գաղափարը, որը կներառի Հայաստանի արտաքին նոր հանձնառությունները»,- ասաց ՀԵԲ ղեկավարը:
Նա նշեց, որ ԵՄ-ն առաջնորդվում է համագործակցության և ոչ պատերնալիզմի սկզբունքով, և եթե Հայաստանը չմիանա ԵՏՄ-ին, ապա ԵՄ-ն, օգտվելով իր իրավասություններից, և Հայաստանը, որպես ինքնիշխան երկիր, կարող են համաձայնությանո գալ՝ ինչ են ցանկանում անել միասին ապագայում:
«Այսինքն՝ երկու կողմերին է մնում որոշել և համաձայնության գալ իրենց հարաբերությունների մակարդակի, ինչպես նաև բովանդակության շուրջ. երկու կողմերն էլ պետք է մտածեն երկարաժամկետ գործընթացում, չնայած ԵՄ մակարդակով ոչինչ քարին գրված չէ»,- ասաց նա:
