Ոչ միայն էժանագին, այլև թանկարժեք բրենդների հագուստները հաճախ պարունակում են թունավոր քիմիական նյութերի հետքեր՝ հաղորդում է ТСН-ը: Դա բացահայտել է միջազգային էկոլոգիական Greenpeace կազմակերպությունը:
«Detox՝ հրաժարվել թույներից» ծրագրի շրջանակներում այն փորձարկել է տարբեր ֆիրմաների 141 տեսակի հագուստներ, որոնք գնվել են 29 երկրներում: Եվ գրեթե բոլորի վրա, ներառյալ այնպիսի արտադրողները, ինչպիսիք են՝ Armani, Tommy Hilfiger, Benneton, Levi’s, GAP և Zara-ն, հայտնաբերվել են տոքսիկ քիմիական նյութեր:
Ընդ որում՝ խուճապի համար պատճառներ չկան: Ոչ մի ստուգված օրինակում տոքսիկ նյութերի թույլատրելի սահմանը չի գերազանցվել, բայց հետքերը հայտնաբերել են գրեթե ամենուր:
Նրանց վատ ազդեցության ուղիղ ապացույցները բացակայում են: Սակայն տարբեր նյութեր կարող են օրգանիզմում հորմոնալ խախտումներ առաջացնել:
Դրանք վատ կարող են անդրադառնալ ծնելիության կարողության վրա: Լվանալու դեպքում այդ նյութերի մեծ մասը դուրս է գալիս հագուստից: Բայց դրանք ջրերի հետ հայտնվում են գետերում և կարող են կուտակվել, օրինակ՝ ձկների մեջ:
Շատ հայտնի ընկերություններ արտադրում են իրենց հագուստը Չինաստանում, Պակիստանում և Հարավ-Արևելյան Ասիայի այլ երկրներում, որտեղ էկոլոգիական նորմերը այնքան էլ խիստ չեն: Որոշ արտադրողներ օպերատիվ կերպով են արձագանքել Greenpeace-ի քննադատությանը:
Այսպես Adidas, Nike և Puma ընկերությունները համաձայնել են հրաժարվել այն նյութերից, որոնք վնասակար են առողջության համար:
Էկոլոգիապես ոչ մաքուր հագուստը կարելի է ճանաչել սուր հոտով կամ էլ այն ցուցումով, որ դրանք չեն ճմրթվում: Խորհուրդ է տրվում նման հագուստը կրելուց առաջ լվանալ:
