«Դո՛ւրս մեր գրպանից» նախաձեռնության անդամներն այսօր իրազեկման ավտոերթ անցկացրին մայրաքաղաքի բոլոր վարչական շրջաններում: Նախաձեռնության անդամները վարորդներին կոչ էին անում չվճարել արձանագրված տուգանքները, դիմել դատարան:
Ավտոերթին հետևում էին նաև ՃՈ աշխատակիցները: Մինչ երթի մեկնարկը՝ նախաձեռնության անդամ Վարդան Հակոբյանը ոստիկաններին ներկայացրեց երթուղին: Ոստիկաններն էլ հորդորեցին շատ դանդաղ չերթևեկել: Ավտոերթն անցավ առանց միջադեպերի:
Նշենք, որ ավտոերթի մասնակից մեքենաների մեջ կար նաև ոստիկանական համակարգի աշխատակիցների մեքենա՝ 90 LS 999 պետհամարանիշներով, որը ևս ազդանշան տալով՝ ակամայից «մասնակցում էր» ավտոերթին:
Ավտոերթի մասնակից վարորդները ընդգծում էին, որ թույլ չեն տալու իրենց նկատմամբ «տեռոր» իրականացնել, դիմելու են դատարան:
Ավտոերթին մասնակցում էին նաև «Դեմ եմ» նախաձեռնության որոշ անդամներ: Երթին ճանապարհին միացան նաև բազմաթիվ այլ վարորդներ: Այն ավարտվեց Էրեբունի թանգարանի մոտ:
Նախաձեռնության անդամ Արսեն Պետրոսյանը հաղորդեց, որ հաջորդ երթը անցկացվելու է մարզերից մեկում՝ Գեղարքունիքում, որտեղ ևս իրազեկման երթ կլինի, ինչպես նաև նախատեսված է ժամանցային ծրագիր՝ Սևանում:
Հիշեցնենք՝ նախաձեռնության անդամները պահանջում են վերացնել կարմիր գծերը, 5 անգամ կրճատել տեսախցիկների և արագաչափերի տուգանքները, մինչ այժմ գրանցված տուգանքների վրա եկած տույժերի նկատմամբ հայտարարել համաներում, հաստատել նոր կանոնակարգ, իսկ մինչ այդ վարորդներին տուգանելու գործառույթը թողնել ՃՈ աշխատակիցների վրա:
