Թուրքիայի վարչապետ Ռեջեփ Թայիփ Էրդողանը խոստացել է նոր սահմանադրություն մտցնել, եթե իրեն Թուրքիայի նախագահ ընտրեն, հաղորդում է Agence France-Presse-ը:
«Նոր սահմանադրությունը նոր ապագա է նշանակում: Նոր սահմանադրությունը նախագահ ընտրվելու դեպքում իմ առաջնահերթ խնդիրներից մեկը կլինի»,- ասել է Էրդողանը Ստամբուլում:
Սահմանադրության փոփոխումը Էրդողանին հնարավորություն կտա ավելացնել նախագահական լիազորությունները, որոնք այժմ ավելի շատ արարողական դեր են խաղում:
Թուրքիայում նախագահական ընտրությունները տեղի կունենան 2014 թ. օգոստոսի 10-ին: Սա Թուրքիայում առաջին համաժողովրդական ընտրությունները կլինեն, նախկինում նախագահը խորհրդարանի կողմից էր ընտրվում: Եթե թեկնածուներից ոչ մեկը անհրաժեշտ քանակի ձայներ չհավաքի, ապա ընտրությունների երկրորդ փուլը կկայանա օգոստոսի 24-ին։
