Բարձրաստիճան մի շարք զինվորականների` ընդդիմության կողմն անցնելուց հետո, այսօր մի շարք դեսպաններ հայտարարել են, որ այլևս չեն ենթարկվում Եմենի նախագահ Ալի Աբդալլահ Սալեհին և անցնում են ընդդիմության կողմը: Այս մասին հաղորդում է France Presse գործակալությունը:
Ընդդիմության կողմն են անցել Սաուդյան Արաբիայում Եմենի դեսպան Մուհամադ Ալի Ալ-Ահվալը: «Ես հայտարարում եմ, որ պաշտպանում եմ երիտասարդների հեղափոխությունը և փոփոխությունները Եմենում»,- ասել է դեսպանը:
«Արյունահեղությունների դեմ և ցուցարարներին աջակցելու մասին է» արտահայտվել Քուվեյթում Եմենի դեսպան Խալիդ Ռաջա Շեյխը: Ավելի վաղ այդ քայլին էր դիմել նաև Սիրիայում Եմենի դեսպան Աբդ Ալ-Վահաբ Թաուաֆը:
Այդուամենայնիվ, այսօր Եմենի նախագահ Սալեհը հայտարարել է, որ չի պատրաստվում հրաժարական տալ, և որ բնակչության մեծ մասն իրեն աջակցում է: Այս մասին հաղորդում է Al-Jazeera-ն: Նախագահը հայտարարել է, որ խնդրել է Սաուդյան Արաբիային միջնորդի դեր ստանձնել երկրի ներքաղաքական կարգավորման հարցում:
Reuters գործակալությունը փոխանցում է, որ առաջիկա ժամերին հայտարարությամբ հանդես կգա պաշտպանության նախարար Մուհամադ Նասեր Ալին, որը կանդրադառնա բարձրաստիճան զինվորականների և դիվանագետների հրաժարականներին:
Հիշեցնենք, որ այսօր առավոտյան 4 գեներալներ և ավելի քան 60 սպաներ անցել են ցուցարարների կողմը` հայտարարելով, որ թույլ չեն տա խաղաղ բնակչության դեմ այլևս զենք կիրառվի:
Այսօր Սալեհը պաշտոնանկ է արել նաև կառավարությունը, քանի որ մի շարք անդամներ նախօրեին հրաժարական են տվել` որպես ցուցարաների դեմ կիրառված բռնությունների դեմ բողոքի նշան:
