Ֆրանսիայի նախկին նախագահ Նիկոլա Սարկոզին հարցաքննության ժամանակ հայտարարել է, որ կանխիկ գումար չի ստացել Ֆրանսիայի ամենահարուստ կանանցից մեկից` L’Oreal պարֆյումերային ընկերության համասեփականատեր Լիլիան Բետանկուրից 2007թ. իր նախընտրական քարոզարշավի անօրինական ֆինանսավորման համար: Այս մասին վկայում են ֆրանսիական «Սյուդ-ուեսթ» թերթի հրապարակումները:
«Ես ճանաչում եմ Բետանկուրների ընտանիքին 28 տարի: Նրանք երբեք ինձ ոչ մի կոպեկ չեն տվել, ես ինքս նման բան չեմ խնդրել»,- հայտարարել է Սարկոզին: Նախկին նախագահի խոսքերով` նա ընդհանրապես չի զբաղվել իր նախընտրական քարոզարշավի ֆինանսավորման հարցերով:
Հարցաքննության ժամանակ երկրի նախկին ղեկավարը հաստատել է, որ Բետանկուրների տանը եղել է ընդամենը մեկ անգամ 2007թ. փետրվարի 24-ին, իսկ Լիլիան Բետանկուրին իր նստավայրում ընդունել է 2008թ. նոյեմբերի 5-ին: Սարկոզիի խոսքերով` վերջին հանդիպման ժամանակ, որը տեղի է ունեցել նախագահի պարտականության կատարման շրջանակներում, L’Oreal-ի համասեփականատիրուհին Սարկոզիից խնդրել է օգնել իրեն աղջկա հետ հաշտվելու հարցում:
