Մինչ վարորդները շարունակում են դժգոհել, թե արագաչափ սարքերի տեղադրման մասին զգուշացումները փոքր ցուցանակների վրա են և շատ հաճախ նկատելի չեն, ճանապարհային ոստիկանությունում քննարկում են ցուցանակները հանելու հարցը: Ավելին, շուտով գործի կդրվի վարորդներին շրջիկ արագաչափերով վերահսկելու մեխանիզմը: Այսինքն, ոչ ոստիկանական, սովորական մեքենաների վրա կտեղադրվեն արագաչափ սարքեր, և, փողոցներով շրջելով, կֆիքսեն արագության գերազանցումները: Ճանապարհային ոստիկանությունից «Հրապարակ»-ին մեկնաբանում են, թե դա արվում է վթարները կանխարգելելու նպատակով: Թե կոնկրետ երբ այս նորամուծությունը կսկսի գործել, ոստիկանության հասարակայնության հետ կապերի և լրատվության վարչության պետ Աշոտ Ահարոնյանը կոնկրետ ժամկետ չնշեց` «շուտով»: «Չի բացառվում, որ առաջիկայում այդ ցուցանակները կհանվեն և այլևս չեն կիրառվի կամ կկիրառվեն ընդհանուր նախազգուշացնող ցուցանակներ այն մասին, որ Հայաստանի Հանրապետությունում երթևեկությունը վերահսկվում է տեսախցիկներով ու արագաչափ սարքերով, քանի որ, ինչպես ցույց են տալիս փորձը և կատարված վերլուծությունը, ցուցանակների կիրառման պարագայում արագաչափ սարքերն իրականացնում են ճանապարհային երթևեկության անվտանգության հատվածական ապահովում»,- մանրամասնեց Աշոտ Ահարոնյանը:
Նշենք, որ եթե հատվածական վերահսկողության պարագայում դեպքերի կանխարգելման արդյունքը դեռ բավարար չէ, և կարիք կա «նորամուծությունների», ապա շատ ցանկալի արդյունք է գրանցվել ֆինանսական առումով: ՃՈ հաշվեհամարին 2011-ի դեկտեմբերից մինչև 2012 թվականի նոյեմբերի 12-ը տուգանքներից մուտքագրվել է 2 մլրդ 872 մլն 501 հազար 802 դրամ, որի 70%-ը գնալու է «Սեքյուրիթի Դրիմ» կազմակերպության բյուջե` ապրանքների և ծառայությունների մատուցման նպատակով, իսկ 30%-ը` ճանապարհային ոստիկանության կարիքների համար: Պատկերացնո՞ւմ եք այդ ֆինանսական հոսքերն ինչքան կաճեն, երբ շրջիկ մեքենաները սկսեն հսկել: Ըստ Ահարոնյանի, չնայած արագաչափերի տեղադրմանը, Երևան քաղաքում արձանագրվել է ճանապարհատրանսպորտային պատահարների դրական վիճակագրություն: 2012 թվականի 10 ամիսների ընթացքում Երևանում գրանցվել է 839 պատահար, որոնց հետևանքով զոհվել է 52, վիրավորվել 1065 մարդ: Նախորդ տարվա նույն ժամանակահատվածի համեմատությամբ պատահարների քանակը մնացել է նույնը, զոհերի թիվը նվազել է 17-ով, վիրավորներինը` 64-ով: Որքան էլ ոստիկանությունը վստահեցնում է, թե այս «բարեփոխումներով» քաղաքացու կյանքի անվտանգությունն են ապահովում, ակնհայտ է, որ շարժառիթը բյուջեի և վերոնշյալ կազմակերպության մուտքերը բազմապատկելն է:
