ՀԱԿ նախաձեռնած ԱԺ նիստը չկայացավ քվորում չապահովելու պատճառով: Գրանցվեց 44 պատգամավոր, մինչդեռ քվորում ապահովելու համար անհարժեշտ էր 66 պատգամավոր:
ԱԺ փոխնախագահներ Էդուարդ Շարմազանովը և Հերմինե Նաղդալյանը եկել էին դահլիճ՝ սակայն չքվեարկեցին: Ներկա չէին նաև ԲՀԿ և ընդդիմադիր խմբակցությունների 9 պատգամավորներ: ՀԱԿ-ից ներկա չէր Ստեփան Դեմիրճյանը, վերջինս հիվանդության պատճառով աշնանային և ոչ մի նիստի չի մասնակցել: ՀՅԴ և «Ժառանգություն» խմբակցության բոլոր պատգամավորները ներկա էին:
Բացակայող պատգամավորների մեծ մասը ԲՀԿ խմբակցությունից էին:Ինչպես նաև ներկա չէր ԲՀԿ առաջնորդ Գագիկ Ծառուկյանը: ՀՅԴ խմբակցության ղեկավար Արմեն Ռուստամյանը ասաց, որ նիստ չապահովելը Սահմանադրության կոպիտ խախտում է, խորհրդարանական մեծամասնությունը պարտավոր էր ապահովել քվորումը: Նրա խոսքերով՝ Սահմանադրության 70-րդ հոդվածի համաձայն, խորհրդարանական մեծամասնությունը պարտավոր էր նիստն ապահովել: Արմեն Ռուստամյանն նաև ավելացրեց, որ իրենք նամակ են պատրաստում՝ էթիկայի հանձնաժողով դիմելու համար: Նրա խոսքերով, այս իրադարձությունը կդառնա էթիկայի հանձնաժողովի երկար քննարկման առարկան:
ԱԺ փոխնախագահ, ՀՀԿ խմբակցության անդամ Էդուարդ Շարմազանովը փոխադարձեց, թե ընդդիմությունը թող թույլ տա՝ իրենք որոշեն իրենց մարտավարությունը, «նրանց բացակայող 9 պատգամավորները, որ չեն ներկայացել նիստին, արդյոք դա՞ էլ կդառնա էթիկայի հանձնաժողովի քննարկման առարկա»:
Հիշեցնենք, որ ՀԱԿ-ը Ընտրական և Քրեական օրենսգրքերում և բնակչության պետական ռեգիստրում փոփոխություններ անելու մասին նախագծերի փաթեթ էր ներկայացրել ԱԺ: Այս արտահերթ նիստը հրավիրվել էր նշված փաթեթը քննարկելու համար: Նրանք հավաքել էին 4 խմբակցությունների՝ ՀՅԴ, ՀԱԿ «Ժառանգություն» և ԲՀԿ խմբակցությունների 48 պատգամավորների ստորագրություն։ Սակայն այդ 4 խմբակցությունները միասին ունեին 53 պատգամավոր:
Ինչպես նշեցինք, նիստին մասնակցել էին 44 պատգամավոր:Է. Շարմազանովը նաև հեգնեց, թե այդ 4 խմբակցությունները միասին թող կարողանային ապահովել իրենց բոլոր պատգամավորների ներկայությունը, հետո նոր իշխանություններին քվորում ապահովելու պահանջ ներկայացնեին:
ԱԺ կանոնակարգ օրենքի համաձայն, խորհրդարանը պարտավոր էր 3 ժամվա ընթացքում կրկին փորձել քվորում իրականացնել:
