Պորտուգալիան անցել է Եվրամիության և Արժույթի միջազգային հիմնադրամի ամեն եռամսյակ անցկացվող սթրես-թեստը: Դա թույլ կտա Լիսաբոնին ստանալ 2.5 մլրդ եվրոյի չափով ֆինանսական օգնության հերթական տրանշը: Այս մասին հաղորդում է Reuters գործակալությունը:
Սթրես-թեստի անցկացումը մեկ շաբաթ է տևել, մինչդեռ նախկինում երկու անգամ ավելի շատ ժամանակ էր պահանջվում:
Միջազգային վարկատուները կանխատեսում են, որ 2013 թվականին երկրի տնտեսությունը կկրճատվի 1 տոկոսով, մինչդեռ այս տարի կրճատումը կկազմի 3 տոկոս: Կանխատեսումը չի փոխվել սեպտեմբերին անցկացված վերջին հետազոտության արդյունքների համեմատ: Տնտեսական աճի վերադարձը ծրագրված է 2014 թվականին, ըստ կանխատեսումների՝ 0.8%-ի չափով:
«Վստահությունը Պորտուգալիայում, ինչպես միջազգային գործընկերների շարքում, այնպես էլ բորսաներում, աճում է»,- նշել է էկոնոմիկայի և ֆինանսների հարցերով եվրահանձնակատար Օլի Ռենը:
Պորտուգալիայի Ֆինանսների նախարար Վիտոր Գասպարը ընդգծել է, որ միջազգային օգնության հերթական տրանշից հետո, իր երկիրը կստանա վարկատուների խոստացած 78 միլիարդ եվրոյի 87 տոկոսը:
Պորտուգալիայի տնտեսության համար առավել մեծ ռիսկ է ներկայացնում Իսպանիայում տիրող ռեցեսիան: Իսպանիան հանդիսանում է իր հարևանի խոշորագույն ներկրողը:
Կառավարությունն ու վարկատուները հայտարարել են 2013-ին Պորտուգալիայի՝ վարկային շուկա վերադառնալու վստահության մասին:
