Թուրքական Cihan լրատվական գործակալության փոխանցմամբ՝ Թուրքիան էլեկտրաէներգիայի սպառման աճի ցուցանիշով աշխարհում դարձել է երկրորդը՝ զիջելով միայն Չինաստանին: Այս մասին նշված է Թուրքիայի էներգետիկայի և բնական պաշարների նախարարության պատրաստած զեկույցում:
Նշվում է, որ 2002 թվականին (երբ Թուրքիայում իշխանության եկավ ներկայիս վարչապետ Ռեջեփ Էրդողանի գլխավորած «Արդարություն և զարգացում» կուսակցությունը), երբ Թուրքիայում մեկ շնչին բաժին ընկնող ազգային եկամուտը կազմում էր 3500 դոլար, մեկ անձի կողմից տարեկան սպառած էլեկտրաէներգիան կազմել է 900 կվտ/ժամ:
2011 թվականի վերջի դրությամբ Թուրքիայում մեկ շնչին բաժին ընկնող ազգային եկամտի չափը կազմել է 10,400 դոլար, իսկ մեկ անձի կողմից տարեկան սպառած էլեկտրանէերգիայի ծավալը՝ 3000 կվտ/ժամ: Կանխատեսվում է, որ 2023 թվականին (Թուրքիայի Հանրապետության 100-ամյակ) դրանք կկազմեն համապատասխանաբար 25,000 դոլար և 6000 կվտ/ժամ:
Հաշվի առնելով բնակչության աճը՝ Թուրքիայում էլեկտրաէներգիայի տարեկան սպառումը 230 միլիարդ կվտ/ժամից հասցվելու է մինչև 500 միլիարդ կվտ/ժամի: Զեկույցում նշված է, որ Թուրքիայում հնարավոր չի լինի առկա բնական պաշարներով տարեկան արտադրել 500 միլիարդ կվտ/ժամ էլեկտրաէներգիա:
Էլեկտրաէներգիայի արտադրության աճը կարող է լինել հետևյալ կերպ. 92 միլիարդ կվտ/ժամ էլեկտրաէներգիա կարող է արտադրվել երկրի հիդրոէլեկտրակայաններում, 33 միլիարդ կվտ/ժամ՝ ջերմաէլեկտրակայաններում, 55 միլիարդ կվտ/ժամ՝ քամու էլեկտրակայաններում, իսկ 11 միլիարդ կվտ/ժամ էլ կարելի կլինի ստանալ երկրաջերմային և արևային էներգիայից, ընդհանուր՝ 191 միլիարդ կվտ/ժամ:
Սրանով իսկ Թուրքիայում էլեկտրաէներգիայի արտադրությունը ներկայիս 230 միլիարդ կվտ/ժամից կավելացվի ևս 191 միլիարդ կվտ/ժամով և կկազմի 421 միլիարդ կվտ/ժամի: Բաց կմնա մնացյալ մոտ 80 միլիարդ կվտ/ժամ էլեկտրաէներգիայի արտադրման հարցը: Այս հարցում Թուրքիային օգնության են գալիս ատոմակայանները, որոնք կառուցվելու են Աքքույու և Սինոպ վայրերում, որոնք էլ սկզբնական փուլում կկարողանան տարեկան արտադրել 80 միլիարդ կվտ/ժամ:
Բացի այդ, ատոմակայանները հնարավորություն կտան նվազեցնել բնական գազի ներկրումից ունեցած մեծ կախվածությունը: Թուրքիայում տարեկան սպառված էլեկտրաէներգիայի 44 տոկոսը բաժին է ընկնում գազով աշխատող էլեկտրակայաններին: Թուրքիան տարեկան 80 միլիարդ կվտ/ժամ էլեկտրաէներգիա արտադրելու գամար տարեկան ներկրում է 7.2 միլիարդ դոլարի գազ, և ատոմակայանների կառուցումը կնպաստի այդ գումարի տնտեսմանը:
