Թուրքիայի խորհրդարանի խոսնակ Ջեմիլ Չիչեքի և Թուրքիայում ԱՄՆ դեսպան Ֆրենսիս Ռիկարդոնեի հանդիպման ժամանակ քննարկվել են հայ-թուրքական խնդրի հետ կապված հարցեր, հայտնում է թուրքական Hürriyet թերթը:
Ի պատասխան ԱՄՆ-ի դեսպանի այն հարցին, թե ինչու Հայաստանի հետ հարաբերությունների կարգավորում նախատեսող Ցյուրիխյան արձանագրությունները չմտան Թուրքիայի խորհրդարան, Չիչեքը դրանում մեղադրել է Հայաստանին:
Նա, մասնավորապես նշել է, որ «ամենամեծ վիրավորանքը, որ հնարավոր է հասցնել մի երկրի կամ հասարակության, ցեղասպանություն իրագործելու մեջ մեղադրելն է»:
«Դա լուրջ խնդիրներ է ստեղծում հարաբերություններում: Թուրքիայի վարչապետ Էրդողանի կողմից ապրիլի 23-ին տարածված հաղորդագրությունը ցեղասպանության կապակցությամբ պետք է արժանի գնահատական ստանա: Ցավոք, ԱՄՆ-ը չգնահատեց այդ հայտարարությունը»,- ասել է Չիչեքը:
Թուրքիայի խորհրադարանի խոսնակը հիշել է նաև երկրի նախագահ Աբդուլլահ Գյուլի 2008թ. և վարչապետ Ահմեթ Դավութօղլուի՝ 2013թ. դեկտեմբերի 12-ի այցերը Հայաստան (Դավութօղթուն մասնակցում էր Սևծովյան տնտեսական համագործակցության նիստին)՝ նշելով, որ ի պատասխան «հակադիր կողմը ոչ մի փոխադարձ քայլ չի ձեռնարկել»:
Չիչեքը հավելել է, որ «Կովկասյան տարածաշրջանում խաղաղության հաստատման համար անհրաժեշտ է Հայաստանի և Ադրբեջանի հարաբերությունների կարգավորում» և ԱՄՆ-ին կոչ է արել «ավելի արդար դիրքորոշում զբաղեցնել» այդ հարցում:
