Սևանի հետ բարբարոսաբար են վարվել։ Նման կարծիք «Առաջին լրատվական»-ի հետ զրույցում հայտնեց «ԷկոԼուր» տեղեկատվական ՀԿ–ի նախագահ Ինգա Զառաֆյանը՝ անդրադառնալով վերջին շրջանում Սևանա լճի մակարդակի իջեցմանը։
«170 միլիոն խորանարդ մետրի փոխարեն կառավարության որոշմամբ բաց է թողնվել 350 միլիոն խորանարդ մետր ջուր, դա աննախադեպ բան է: Օրենքով նախատեսված սահմանը 170 միլիոնն է: Հենց դրա համար էլ իջավ մակարդակը լճի: Եվ Սևանի հանձնաժողովը, որը դեմ է եղել և ուրիշ կարծիք է ունեցել, խոսք չունեցավ այս դեպքում:
Այսինքն մենք հատուկ օրենք ենք ընդունում, գումարներ ծախսում բյուջեից Սևանի պահպանման համար, իսկ մյուս կողմից էլ այդպիսի բարբարոսական վերաբերմունք ենք ցուցաբերում: Առաջին հերթին էկոհամակարգ է խախտվում: Ոչ ոք չգիտի՝ լիճն ինչի՞ հաշվին է իջնում: Մենք ջրի պաշար չունենք: Սա ոչ լավ ուսումնասիրված մի երևույթ է, մի քանի տարի հետո այդ մակարդակը կարող է ոչ թե իջնել՝ այլ բարձրանալ: Մեկը, չհասկանալով լրջությունը, իր օբյեկտն է պահպանում, մեկը ձկնաբուծարանի համար ջուր պետք է ստանա: Այս և այլ նմանատիպ խնդիրների լուծման համար խաղուպար են անում Սևանի հետ»,- ասաց Ինգա Զառաֆյանը:
Լուսանկարը՝ Էդգար Մարուքյանի
