ԱԺ ՀՀԿ խմբակցության պատգամավոր Վարդան Այվազյանը մայիսի 22-ին ԱԺ նիստում Կառավարության ծրագրի վերաբերյալ իր դիրքորոշումն արտահայտելիս նշեց, որ ակնհայտ է մի բան` նախօրեին քննարկման նկատմամբ հետաքրքրություններն ավելի բուռն էին: Այվազյանի խոսքով` Կառավարության ծրագիրը քաղաքական փաստաթուղթ է, ուստի բնականաբար ունի իր քաղաքական գնահատականն ԱԺ-ում:
«Ակնկալել, որ պետք է լինեն քաղաքական գնահատականներ, ես այստեղ որևէ տարակուսանք չեմ կարծում, բայց ինչքան ընդունելի է ձեր ասածը, այդքան և մեր ասածը պիտի ընդունելի լինի: Իրականում այն մարտահարավերները որ կան, Կառավարությունն իր տեսլականն ունի, թե ինչպիսի գործիքներով կիրականացնի դա, ամբողջ այդ գործընթացների ժամանակահատվածում մենք ականատես կլինենք: Ես երկու անգամ եմ Կառավարության գործունեության ծրագրի շրջանակներում ելույթ ունեցել` 2008-ին և մյուսը` 2014-ին, կարող եմ ասել` առաջին անգամ Կառավարությունն արձանագրում է կարևորագույն դրույթ, որ իր գերխնդիրը հանդիսանում է ՀՀ քաղաքացին, մնացած ցանկացած այլ գործառույթ միայն իր քաղաքացու բարեկեցության ապահովման գործընթացն է, նախկինում չի եղել այսպիսի առանձնահատուկ նախանշում»,- ասաց նա:
Այվազյանի խոսքով` նախկին Կառավարությունների օրոք եղել է թե տնտեսական աճն էլ, պետբյուջեի կատարողականն էլ է շատ կարևոր: Պատգամավորը, սակայն, հորդորեց «մի քիչ անկեղծ խոսել» և երկրի վարչապետի բաց և ուղիղ խոսակցությունը փորձել վերածել քննարկման խնդրի:
Նա նշեց, որ Կառավարությունն ասում է` Փոքր և միջին բիզնեսը հարկատու չեն, սոցիալական խնդիր լուծող են, և իրենք պատրաստ են նրանց տալու հարկային արտոնություններ, տալու և հնարավորություն ստեղծելու, ապա նշեց, որ այս հարցն այլ խմբակցություններ ևս բարձրացնում էին:
«Խնդրում եմ, ստեղծեք այդ մեխանիզմները և եկեք միասին քննարկենք: Ցավոք, կան մարդիկ, որ միայն սևացնելու խնդիր ունեն: Կառավարությունը առաջարկում է, հիմա էդ ծրագրի տե՞րն ենք, թե՞ տերը չենք, թե՞ հիմա եկավ` ով ա շուտ առաջարկել: Երկար ժամանակ մենք խոսում էինք, ասում էինք` ԱԱՀ-ն սահմանից ուզում ենք հանել, Կառավարությունն ասում է` ես պատրաստ եմ գնալու, ոչ միայն պատրաստ է, արել է արդեն առաջին քայլը: Նոր ինձ հարցնում է, ասում է` 30 օրը շա՞տ է, թե՞ քիչ է. Է, հիմա ի՞նչ, «հեչ»-ն է լա՞վ, թե՞ 30 օրը»,- ասաց նա` նշելով, որ յուրաքանչյուրը բարձրանում է, ասում` քաղաքական կամք:
«է, հեսա քաղաքական կամքի դրսևորումը: Ասում ա` սկսենք մեզանից, վա՞տ է ասում: քաղաքական կամքը սա է»,- նշեց նա` նկատելով, թե նոր նշանակված կառավարությանը կարող են մեղադրել ցանկացած այլ բանի մեջ, բայց որևէ մեկը չի կարող մեղադրել, որ նրանք իրենց գործը չեն կարող կատարել, քանի որ նրանք պրոֆեսիոնալ են և իրականացնող են: Այվազյանի համոզմամբ` քաղաքական զոհասեղանին շատ լուրջ խնդիր է դրված, և Կառավարությունը դատապարտված է հաջողված լինելու:
