Ռուսաստանի Օրյոլ քաղաքում արտակարգ իրավիճակների նախարարությունը շանը փրկելու օպերացիա է իրականացրել, որը մոլորվել էր ճյուղերից պատրաստված՝ քաղաքի խորհրդանիշ արծվի արձանի մեջ: Մայիսի 20-ին տեղի ունեցած այս դեպքի մասին հայտնում է lenta.ru-ն՝ հղում անելով արտակարգ իրավիճակների նախարարության մամուլի ծառայությանը:
Փրկարարների տեղեկացմամբ՝ կեչու ճյուղերից պատրաստված արձանի մեջ կենդանուն տեսել է մոտակայքով անցնող մի կին: Նա տարօրինակ ձայներ է լսել ու ավելի մոտ գնացել կոմպոզիցիային: Տեսնելով մոլորված շանը՝ կինն անմիջապես զանգահարել է փրկարար ծառայություն:
Փրկարարների խումբ է ուղարկվել քաղաքային կայարանի հրապարակ, որտեղ գտնվում է արծիվը: Նրանք մի քանի րոպեում ազատել են ծուղակն ընկած շանը: Փրկարարական գործողության ավարտից հետո շունը փախել է: Փրկված շունը թափառական է, թե տեր ունի՝ հայտնի չէ:
Արծվի քանդակն Օրյոլում կանգնեցվել է 2008 թվականին:
