Հարավային Կովկասի 3 երկրները կարևոր նշանակություն ունեն Չինաստանի համար և լավ հարաբերություններ ունեն Չինաստանի հետ: Այս մասին «Առաջին լրատվական»-ի հետ զրույցում այսօր ասաց Հայաստանում Չինաստանի դեսպան Թիան Չանչունը:
«Մետաքսի ճանապարհը պատմականորեն Հայաստանով է անցել, և Հայաստանը եղել է այդ ճանապարհի կարևոր կետերից մեկը»,- ասաց Թիան Չանչունը՝ հավելելով, որ Չինաստանի ղեկավարը կոնցեպցիա է առաջարկել՝ ստեղծելու համար մետաքսի մեծ ճանապարհի նոր տնտեսական միջանցք, որի մեջ նշանակալի դեր ունեն նաև Հարավային Կովկասի երկրները:
«Մենք հույս ունենք այս երեք երկրների հետ, հատկապես՝ Հայաստանի հետ, խորացնել առավել սերտ հարաբերություններ և ստեղծել կամուրջ մետաքսի ճանապարհի համար: Մետաքսի մեծ ճանապարհի ստեղծման գլխավոր խնդիրն է՝ ամրապնդել հաղորդակցության, ճանապարհների շինարարության և այլ ոլորտներում հարաբերությունները: Մետաքսի ճանապարհի և Հայաստանի տնտեսության զարգացման ուղղությունները համընկնում են: Կառուցման ընթացքում գտնվող հյուսիս-հարավ ավտոմայրուղին ևս կարևոր նշանակություն ունի մետաքսի ճանապարհի համար»,- ասաց Թիան Չանչունը՝ հավելելով, որ Չինաստանի կառավարությունը խրախուսում է չինացի գործարարներին՝ Հայաստանում ծրագրեր իրականացնելու համար:
Պատասխանելով այն հարցին, թե ինչպե՞ս է գնահատում Չինաստանը ԼՂ հարցի կարգավորման գործընթացն ու ինչ դեր կարող է ունենալ այդտեղ, Թիան Չանչունը նշեց, որ իրենք խրախուսում են խնդրի խաղաղ կարգավորումը: «Մենք ցավում ենք, որ նման կոնֆլիկտ է եղել: Չինաստանի կառավարությունը միշտ խրախուսել է խաղաղ ճանապարհով նման խնդիրների կարգավորումը: Հույս ունենք, որ բոլոր կողմերը բանակցությունների միջոցով կլուծեն այդ հարցը: Բարձր ենք գնահատում միջազգային կազմակերպությունների ջանքերը, որոնք շատ բան են ներդրել խաղաղ կարգավորման գործում»,- ասաց Թիան Չանչունը:
