Ակամա հայտնվելով «Դպրոցական սկանդալի» կիզակետում և գրեթե երկու շաբաթ շարունակ դառնալով լրատվամիջոցների կողմից անխնա կերպով շահարկված ու պիտակավորված անուն, ինչի պատճառով իմ պատիվն ու մանկավարժի կոչումը վարկաբեկվեց Հայաստանով մեկ, դիտարկումներս ու եզրակացություններս արեցի՝ լրատվականների պատրաստած նյութերը դիտելուց հետո:
Փաստորեն, մեր երկրում կա մի նախարարություն, մի քաղաք, մի դպրոց, մի տնօրեն և ուսուցչական կոլեկտիվ, մի ծնողական ու աշակերտական հաշտ ու համերաշխ հանրություն, որտեղ բոլորը բոլորից գոհ են, որտեղ խնդիրներն իսպառ բացակայում են, տիրում է սիրո ու համերաշխության, ի բարօրություն կրթության և բարոյականության իդեալական մթնոլորտ: Եվ այս շրջանակի մեջ իմ՝ գերմաներեն լեզվի ուսուցչուհուս, բարձրացրած ու ահազանգած լրջագույն մասնագիտական և մանկավարժական խնդիրները ընդամենը «երկու վիճող կանանց» միջադե՞պ է (այսկերպ է որակել եղելությունը կրթության նախարար Արմեն Աշոտյանը՝ 1in.am-ի տեսանյութում):
Մի՞թե այդ նամակը գերմաներեն եմ գրել, որ ոչ ոք չի ընկալում ինչի մասին է խոսքը: Այսինքն՝ Ձե՞զ էլ կարողացան շեղել բուն խնդիրներից, պարոն նախարար, հրամցնելով ինչ-որ «էրոտիկ սկանդալի» անհեթեթ վարկած: Ինչպես տեսանյութում տեսաք, երեխաներն իրենք էլ վերջապես խոստովանեցին, որ բոլորին տհաճ թվացած տեսանյութը ուսուցչուհին կասեցրել է: Հարց է ծագում՝ էլ ինչի՞դեմ են բողոքել աշակերտները՝ այն էլ դեպքից երեք շաբաթ անց:
Պարզ է, որ դեռահասներին ուղղորդել է տնօրենը, ինձ զրպարտելու ճանապարհով՝ հանրության ուշադրությունը շեղելով բաց նամակում թվարկած տնօրինության բոլոր ապօրինություններից: Ու եթե, ինչպես տեսանյութում է հնչում, ես տնօրեն դառնալու հավակնություն ունեմ, ապա ինչպե՞ս կբացատրեք՝ ինչո՞ւ չէի դրել թեկնածությունս բոլորովին վերջերս տեղի ունեցած ընտրություններին, այն դեպքում, երբ հաջորդ ընտրություններին արդեն թոշակի անցած կլինեմ, որտե՞ղ է տրամաբանությունը: Միահամուռ հալածանքներն էլ սպասելի էին, դրանք նույնպես մեկ անգամ ևս հաստատում են բաց նամակումս ասվածի պարզ ճշմարտությունները: Որոնք, չգիտես ինչու, համառորեն անտեսվում են և չեն քննվում:
Այնպիսի տպավորություն ունեմ, որ, բաց նամակիս բովանդակությանը ոչ ոք ծանոթ չէ, իսկ նամակի աղմուկի հետքերով նախարարությունից ժամանած աշխատակիցները, ովքեր ինձ հորդորել էին երկրորդ նամակ գրել նախարարին ՝ դեպքերի օրինակներով թվարկելով դպրոցում տեղի ունեցող ապօրինություններն ու օրինախախտումները, չեն էլ փոխանցել այն Ձեզ, պարոն նախարար: Եթե դեռ տեսչական ստուգումները չավարտված տվել եք նման «գնահատական» (երկու կնոջ վեճ է), ապա կարո՞ղ է Ձեր ուղարկած հանձնաժողովն այլ տեսակետ հայտնել: Պարոն նախարար, ձեզանից ակնկալում եմ հարցի միմիայն մասնագիտական և խորքային զննում:
