Iran News-ի փոխանցմամբ՝ չնայած նրան, որ ԱՄՆ-ի ու ԵՄ-ի սահմանած պատժամիջոցները լուրջ սահմանափակումներ են ստեղծում նավթի արտահանման հարցում՝ Թեհրանին հաջողվում է ընդլայնել նավթի մատակարարումն ասիական երկրներին:
Վերջին տվյալների համաձայն, իրանական «սև ոսկու» արտահանումը Հնդկաստան սեպտեմբերին աճել է 1.5 անգամ՝ հասնելով օրական մինչև 300,000 բարելի:
Թեև սեպտեմբերին Ճապոնիային օրական մատակարարվող իրանական նավթի ծավալը կրճատվել է 7 տոկոսով՝ նախորդ ամսվա համեմատ, այնուամենայնիվ այն կազմել է օրական մոտ 200,000 բարել: 2011 թվականի համեմատ՝ զգալիորեն աճել է Ճապոնիային իրանական նավթի արտահանման ծավալը:
Սեպտեմբերին իրանական նավթի բոլոր մատակարարումների 40 տոկոսը նախատեսված է եղել Չինաստանի համար: Միջազգային էներգետիկ գործակալության գնահատմամբ՝ 2012 թվականի օգոստոսին իրանական նավթի օրական արտահանումը Չինաստան կազմել է ավելի քան 1 միլիոն բարել: Սեպտեմբերին այդ ցուցանիշը նվազել է մինչև օրական 860,000 բարելի, ինչը նույնպես ազդեցիկ ցուցանիշ է:
