Հայաստանում Ռուսաստանի դեսպան Իվան Վոլինկինը Ноев Ковчег հայկական ռուսալեզու պարբերականի հետ զրույցում հանդես է եկել հայտարարությամբ, թե՝ հարկավոր է «չեզոքացնել» Հայաստանում գործող բոլոր այն հասարակական կազմակերպությունները, որոնք փորձում են սեպ խրել ռուս-հայկական հարաբերություններում:
«Ժառանգություն» կուսակցության գլխավոր քարտուղար Ստյոպա Սաֆարյանն «Առաջին լրատվական»-ի հետ զրույցում անդրադառնալով դեսպանի հայտարարությանը՝ նշեց, որ վերջին շրջանում սա երկրորդ դեպքն է, երբ Հայաստանում Ռուսաստանի դեսպանն ակնհայտորեն խառնվում է Հայաստանի ներքաղաքական կյանքին, ավելին՝ տալիս է գնահատականներ, որոնք հակասում են Հայաստանի Սահմանադրության առանցքային դրույթներին, մասնավորապես՝ Հայաստանի Հանրապետությունը ինքնիշխան, ժողովրդավարական, իրավական, սոցիալական պետություն է:
«Այս կտրվածքով պարոն դեսպանն, իհարկե, իրավունք ունի իր ինքնուրույն կարծիքն ունենալու հայ-ռուսական հարաբերությունների ներկայիս որակի, բովանդակության և զարգացումների առթիվ հնչող քննադատությունների կապակցությամբ, բայց պարոն դեսպանը թերևս սխալվում է, եթե կարծում է, որ ամեն քննադատություն նշանակում է դեմ լինել այդ հարաբերություններին: Հայաստանի Հանրապետությունում շատերը համաձայն չեն այն քաղաքականության հետ, որն, օրինակ, իրականացնում է Ռուսաստանը՝ Հայաստանի, ԼՂ-ի և այլ հարցերի կապակցությամբ, բայց դա ամենևին հակառուսականություն չէ, ամենևին թշնամական վերաբերմունք չէ Հայաստանի և Ռուսաստանի միջև հարաբերություններին:
Մտահոգիչ է, որ դեսպանը գրեթե ակնարկում է Հայաստանում ժողովրդավարությունը խլացնելու, լռեցնելու մասին, մի քայլ, որ, ցավոք, Ռուսաստանն արել է՝ ՀԿ-ների մասին օրենքում կատարելով փոփոխություններ և ըստ էության լրտես, «ագենտ», «շպիոն» որակելով բոլոր ազատամիտ, Արևմուտքի այս կամ այն, կամ միջազգային կազմակերպությունների հետ համագործակցող անհատներին»,- ասաց նա` նկատելով, որ թերևս սա ոչ միայն անցանկալի է Ռուսաստանի համար, քանի որ նա Հայաստանի ռազմավարական դաշնակիցն է, և բնականաբար՝ չի կարող նման մոտեցումը չմտահոգել Հայաստանին, այլև փաստացի ակնարկում է, որ Հայաստանն ինքը ևս պետք է անցում կատարի այդ դրույթներին և արգելի այն իրավապաշտպան ՀԿ-ների գործունեությունը, որոնք դրամաշնորհային ծրագրեր են իրականացնում միջազգային կազմակերպությունների հետ:
Սաֆարյանը նշեց, որ ուղղակի պատահականություն չի համարում այն, որ այս օրերին նույնպիսի կացնային գործողությունների է անցել նաև մեր հարևան Ադրբեջանը՝ նախագահ Իլհամ Ալիևը, և ենթադրելի է, որ նույն պետական դավաճանության, շպիոնաժի և այլ անհեթեթ մեղադրանքներով իրավապաշտպաններին, ընդդիմախոսներին լռեցնելու, բանտարկելու նրա գործելաոճը ուղղակիորեն հաճելի է Ռուսաստանին: Հետևաբար տեսանելի է դառնում, որ Ռուսաստանի դեսպանի, այսպես ասած, «հայտարարությունն» ամենևին կարծիք չէ, այլ թերևս ցուցում, որն արդեն գործողության մեջ է դրված հետխորհրդային տարածքում: Սաֆարյանի խոսքով՝ առաջինն այն իրագործվել է Ռուսաստանում, իսկ նույնն այսօր արդեն բիրտ գործողությունների տեսքով պրակտիկա է դարձել նաև Ադրբեջանում:
«Հայաստանի իշխանությունները պետք է խելամիտ գտնվեն ոչ միայն այս հայտարարությանն արձագանքելու, այլև տուրք չտալու համար, որովհետև սեփական ընդդիմախոսին լռեցնելը, անշուշտ, կարող է շատ գայթակղիչ լինել, բայց դրանից հաստատ որևէ իշխող ռեժիմ չի շահել և չի շահելու մոտ ապագայում: Սա մի աշխարհ է, որտեղ բռնապետները կարող են ունենալ մեկ օրվա կամ մեկ տարվա հաջողություն, բայց երկարատև հաջողություն ունենալ չեն կարող: Կարծում եմ՝ այնքան խոհեմ պիտի լինեն, որ հասկանան՝ Հայաստանի ժողովրդավարական հեռանկարը շատ ավելի թանկ է, և տուրք չտան դրան: Մտահոգիչ կլինի, եթե Հայաստանում, այդ թվում՝ ԱԺ-ում, գտնվեն մարդիկ, ովքեր կփորձեն ռուսական այս տխուր փորձը ներդնել Հայաստանում և օրենսդրորեն արգելել ՀԿ-ների բնականոն զարգացումը, որոնք այսօր Հայաստանի և հայաստանցու հպարտությունն են»,- ասաց նա՝ հավելելով, որ ժողովրդի համար, թերևս, հենց հույս են այդ շարժումները, որոնք խնդիրներ են լուծում:
Սաֆարյանի համոզմամբ՝ Հայաստանի հասարակությունը պետք է միահամուռ ո՛չ ասի և գնահատական տա նման դրսևորումներին: Դեսպանը փորձում է հակաժողովրդավարական այս քայլերը քողարկել հայ-ռուսական բարեկամության տրաֆարետի ներքո, բայց դրանք ամենևին միայն այդ բարեկամության մասին չեն: Ըստ Սաֆարյանի՝ դրանք Հայաստանի ժողովրդավարության մասին են, ուստի եթե տուրք տանք այդ ցուցումներին, մեր իսկ ձեռքով կսպանենք Հայաստանի ապագան:
