«Նոր կառավարության կազմը մեզ չի կարող բավարարել: Միանշանակ է մեզ համար, որ այս կառավարությունը որևէ դրական աշխատանք չի կարող իրականացնել, որովհետև կա նրանց նախկին փորձը տարբեր համակարգերում իրականացրած գործունեություններում»,- «Առաջին լրատվական»,-ի հետ զրույցում նման տեսակետ հայտնեց «Ժառանգություն» կուսակցության փոխնախագահ Արմեն Մարտիրոսյանը, որն ընդգծեց նաև, որ անգամ կառավարության ծրագրին չպետք է սպասել:
«Ես այն կարծիքին եմ, որ ծրագիրը կարևոր է այն դեպքում, երբ մարդիկ ծրագրի ամեն կետի համար պատասխանատվություն են կրում, և ծրագիրն իսկապես գործունեության առանցքն է լինում։ Օրինակ, մինչև հիմա գործունեության առանցքը եղել է՝ ինչպես պետք է ընտրությունները կեղծեն, բյուջեն ինչ ծավալով պետք է թալանել, բիզնեսին ովքեր պետք է հովանավորներ կանգնեն, ուստիև այդ ծրագրին ես ուշադրություն չեմ դարձնում»:
Մարտիրոսյանն այն համոզմունքն ունի, որ նույնիսկ եթե ոսկետառ նախադասություններ կազմվեն, միևնույն է, իրենք գիտեն, թե իրականում ինչ է լինելու:
«Կառավարությունում այն անձինք են, որոնք այս տարիների ընթացքում շատ բացասական քայլեր են արել, որևէ նորություն ես չեմ սպասում:
Հովիկ Աբրահամյանը հայտնի է որպես Հայաստանում ընտրությունները կեղծելու ամենամեծ կազմակերպիչ, հանրությունը դրա մասին տեղյակ է, առաջին անգամ իր այդ մեծ կազմակերպչական ջիղին 2007 թվականին եմ առնչվել:
Ինքն, ըստ էության, իր հարստությունը կարողացե է կուտակել այն ժամանակահատվածում, երբ եղել է գործադիր իշխանությունում բարձր պաշտոնների»:
Մեր զրուցակիցն ընդգծեց, որ ծայրահեղ դեպքում կառավարության մեջ մեկ կամ երկու նախարար կարող են օլիգարխ լինել, բայց այս կառավարությունը օլիգարխների կառավարություն է:
Մենք հետաքրքրվեցինք նաև, թե արդյոք «Ժառանգություն»-ն անելու է ամեն ինչ արտահերթ ընտրությունների հասնելու համար, թե՞ ԲՀԿ առաջնորդի հայտարարության համահունչ կսպասեն հերթական համապետական ընտրություններին և կշրջանցեն Մելիք-Ադամյան փողոցը:
Մեր հարցադրմանն ի պատասխան՝ Մարտիրոսյանն ասաց․ «Արտահերթի նախադրյալներ և պահանջներ կան այսօր, դրա լավագույն օրինակը նախագահական նախորդ ընտրություններն էին, երբ իշխանությանը չմնաց այլ բան անելու, քան բառի բուն իմաստով գիշերը ձայնագողությամբ զբաղվել:
Ամբողջ խնդիրն այն է՝ արդո՞ք այդ նախադրյալներն ու գործընթացները իրար հետ կհամընկնեն:
Ինչ վերաբերում է ԲՀԿ նախագահի երեկվա ասածին, ես ուղիղ խոսք չեմ լսել, որ ասել է՝ արտահերթ գործընթաց հնարավոր չէ. դա մեկնաբանման խնդիր է: Նա ասել է, որ հաջորդ իշխանությունը Մելիք-Ադամյանով չէ որ անցնելու է»:
Նա հավելեց, որ «Ժառանգություն»-֊ը միշտ դրել է արտահերթ նախագահական և խորհրդարանական ընտրությունների հարց․ «Մենք պատրաստ ենք շարունակել պայքարը համակարգային փոփոխությունների համար: Եթե որևէ մեկը հույս ունի, որ 2017-ին կարող է ՀՀԿ-ն հաղթել՝ այդպես չէ, այդ ժամանակ ավելի նվազ բնակչության երկրում ավելի հեշտ ղեկավարվող անձանցով ավելի հեշտ է կեղծելու ընտրությունները»:
Մանրամասները՝ մեր տեսանյութում
