«Առաջին լրատվական»-ի տեղեկություններով, «Զվարթնոց» օդանավակայանում գործող տաքսի ծառայությունները պատկանում են փոխվարչապետ Արմեն Գևորգյանին: Հիշեցնենք, որ օդանավակայանում գործող տաքսիներն իրենց ծառայությունների դիմաց սովորական կամ շուկայական արժեքից կրկնակի-եռակի ավելի շատ գումար են պահանջում: Ընդ որում` թույլ չեն տալիս, որ օդանավակայանի տարածք որևէ այլ տաքսի ծառայության մեքենա մտնի և ուղևորի սպասարկի: Լավագույն դեպքում դրսի տաքսիները մտնում են, ուղևորին իջեցնում և շատ արագ հեռանում: Հակառակ դեպքում, նրանց կամ դուրս կհանեն այնտեղից, կամ նրանց վրա էլ կտարածվի սպասելու համար հարկվող` կրկին բավականին մեծ գումար կազմող հարկը:
Այսօր ԱԺ-ում բյուջեի քննարկմանը ներկա էր նաև Արմեն Գևորգյանը, և «Առաջին լրատվական»-ը փորձեց նրանից մեկնաբանություն ստանալ, թե իսկապես օդանավակայանի տաքսի ծառայությունն իրեն է պատկանում: Մեզ հետաքրքրում էին նաև իր հետագա պաշտոնավարման և գործունեության հետ կապված հարցեր: Բայց փոխվարչապետը չցանկացավ լսել հարցերը:
Հիշեցնենք, որ նախկին նախագահ Ռոբերտ Քոչարյանի օրոք «Զվարթնոց» օդանավակայանը 30 տարով հավատարմագրային շահագործման է հանձնված արգենտինահայ Էդուարդո Էռնեկյանին: Եվ օդանավակայանի տարածքում գործունեություն կարող են ծավալել միայն քոչարյանամերձ գործարարները: Ռ. Քոչարյանի հետ կապ չունեցող որևէ այլ գործարարի թույլ չի տրվում այնտեղ սպասարկման հետ կապված որևէ գործունեություն ծավալել:
Օրինակ` ԲՀԿ ղեկավար Գագիկ Ծառուկյանին է պատկանում «Ավիասնունդ» ընկերությունը, որն էլ թռիչքների համար ինքնաթիռների սնունդ մատակարարող միակ ընկերությունն է: Դրա արժեքը մտնում է ավիատոմսի արժեքի մեջ: Երբ «Զվարթնոցը» նոր էր հանձնվել Է. Էռնեկյանին, տեղեկություններ հրապարակվեցին, որ միայն ավիասնունդի գինը յուրաքանչյուր տոմսի ընդհանուր գնի մեջ 30-35 դոլարին համարժեք դրամ է կազմում:
Նաև հայտնի է, որ Հայաստանում ավիածառայությունների գները ամենաթանկն են մեր տարածաշրջանում, որի պատճառը նաև օդանավակայանում գործող քոչարյանամերձ բիզնես-ծառայությունների բարձր գներն են:
Լուսանկարը՝ PanARMENIAN Photo-ի
