Քաղաքականությունը բարդ պրոցես է, ցանկություններն ու նպատակներն իրար զուգորդում են, հնարավորությունները՝ ոչ: ԱԺ նախագահ Գալուստ Սահակյանը ապրիլի 30-ին լրագրողների հետ ճեպազրույցում նշեց, թե ում մոտ որևիցե գաղափար է արթնանում, մտածում է՝ այդ գաղափարն այնպիսին է, որ արդեն ժողովուրդը մտել է այդ գաղափարի մեջ, և ինքն ուղղորդողն է:
Հարցին՝ ԲՀԿ կողմից իր օգտին քվեարկելուց հետո ՕԵԿ-ի ու ԲՀԿ միջև ինչ տարբերություն կա, Սահակյանը պատասխանեց. «Շատ մեծ տարբերություն կա, տարբեր քաղաքական ուժեր են, տարբեր ուղղվածություններ ունեցող»:
Ճշգրտմանը՝ ՀՀԿ-ի հետ հարաբերություններում ինչ տարբերություն կա այդ երկու ուժերի միջև, նա նշեց. «Մարդկային փոխհարաբերություններ են, բոլորը պիտի փոխհարաբերվեն:
Փոխհարաբերությունները կամ հարաբերությունները չի նշանակում, որ մարդիկ մերվեցին իրար հետ, մի տեսակը՝ քաղաքական, մյուսի հետ նույն որակը դարձավ: Յուրաքանչյուր քաղաքական ուժ իր ռազմավարությունն ունի: Էդտեղ նմանություններ, տարբերություններ պետք չէ փրկել»,- ասաց նա:
Սահակյանը նշեց, որ իր համար անակնկալ էր ԲՀԿ –ական պատգամավորի համահեղինակությամբ մշակված նախագծի քվեարկությանը ԲՀԿ-ի չմասնակցելը, քանի որ հիմնական օրինագծի գաղափարները նաև մշակել էր ԲՀԿ-ն՝ հանձին Միքայել Մելքումյանի:
«Ինձ համար շատ տարօրինակ էր, բայց նաև կարծում եմ հետևյալը. քառյակը եթե փորձում է միասին հարց քննարկել և որոշում է կայացնում, ես կարծում եմ՝ դա էլ է տրամաբանական: Ես դա քաղաքական ակցիա եմ համարում քառյակի կողմից: Քաղաքական գործիչներ կան ընդդիմադիր, որոնք հետևյալն են հորդորում, այսինքն՝ ինչքան քաղաքական կապիտալ ունեք, քայլերը այդչափով արեք, որպեսզի կամաց-կամաց շահեկան վիճակի հասնեք: Իսկ քառյակի տրամաբանությունը այն է՝ հիմնական ուժերն ասում են՝ ինչու կամաց-կամաց, միանգամից»,- ասաց նա՝ հավելելով, որ պետք է կարողանալ քաղաքական պոտենցիալն օգտագործել հզորանալու համար:
Ըստ Սահակյանի՝ իրենք՝ ոչ իշխանական ուժերը, մի քայլ ավել են անում՝ մտածելով, որ արդեն հաղթել են, ինչպես իրենք են ասում, ու միշտ պարտություն են կրում:
Լուսանկարը՝ Photolure-ի
