Ադրբեջանական APA լրատվական գործակալությանը տված հարցազրույցի ժամանակ Ադրբեջանում Թուրքիայի դեսպան Իսմայիլ Ալփեր Ջոշքունն անդրադարձել է երկկողմ հարաբերությունների խնդրին:
«Մենք պետք է մեր երկկողմ հարաբերությունները զարգացնենք բոլոր ոլորտներում: Ներկայումս մեր փոխադարձ ներդրումները կազմում են մոտ 10 մլրդ դոլար: Մենք նպատակադրվել ենք մոտ ժամանակներս այդ ցուցանիշը հասցնել մինչև 20 մլրդ դոլարի: Մեր մյուս նպատակը երրորդ երկրներում թուրքական ու ադրբեջանական կապիտալ ներդրումների համար ճանապարհ հարթելն է:
2011 թվականին երկու երկրների ապրանքաշրջանառությունը կազմել է 3.5 մլրդ դոլար, ընթացիկ տարում այդ ցուցանիշը հասել է 5 մլրդ դոլարի, և մենք մտադիր ենք դա հասցնել մինչև 10 միլիարդ դոլարի: Իզմիրում դրվել է STAR նավթաքիմիական գործարանի կառուցման հիմքը, շարունակվում են «Բաքու-Թբիլիսի-Կարս» (ԲԹԿ) երկաթուղու կառուցման աշխատանքները, որոնց ավարտը պլանավորված է 2013 թվականի վերջին, իսկ երկաթուղու գործարկումը՝ 2014 թվականին:
Այդ երկաթուղու կառուցմամբ կբացվի երկաթուղային ճանապարհ Չինաստանից դեպի Լոնդոն: Պլանավորված է TANAP գազատարի կառուցման աշխատանքները սկսել 2013 թվականին և ավարտել 2017 թվականին: Գազատարի տարեկան թողունակությունը կազմելու է 16 մլրդ խոր. մետր: Հերթի մեջ է «Կարս-Իգդիր-Նախիջևան» (ԿԻՆ) երկաթգծի ու գազատարի կառուցումը»:
