Ալերգոլոգ Քրիստինա Ջամալյանը «Առաջին լրատվական»-ի «Ցավազրկող» հաղորդաշարի հերթական թողարկմանը ներկայացնում է քսանմեկերորդ դարի ամենատարածված հիվանդություններից մեկի մասին՝ ալերգիայի:
Թվում է, թե ալերգիան գուցեև անվնաս է, գուցե խնդիրներ չի առաջացնի, հատկապես սուր վիճակներ, որոնք բնորոշվում են շնչարգելությամբ, այտուցներով, որոնք առաջացնում են կյանքի համար վտանգավոր վիճակներ, սակայն կցանկանամ նշել, որ ալերգիան շատ հաճախ կարող է առաջացնել կյանքի համար վտանգավոր վիճակներ:
Իսկ ի՞նչ է ալերգիան: Ալերգիան միջավայրի ազդակների ներգործության հանդեպ մարդու օրգանիզմի գերզգայուն վիճակն է, որն առաջանում է օրգանիզմի ռեակտիվության փոփոխության հետևանքով:
Ալերգիա եզրն առաջին անգամ կիրառվել է 1906 թվականին Կլեմոն ֆոն Պրիկյոնի կողմից: Ըստ Պրիկյոնի՝ իմունիտետի և գերզգայունության ռեակցիաների հիմքում ընկած են իմունային մեխանիզմներ: Աշխարհում ալերգիկ ռենիտ ունի բնակչության 15-30, իսկ Հայաստանում՝ 10-15 տոկոսը:
Գիտական տեսանկյունից ալերգիան սովորաբար առաջանում է պրոտեինների պատճառով: Գոյություն ունեն ալերգիայի բազմաթիվ տեսակներ՝ կենսաալերգածիններ, ծաղկափոշու, սննդային, արդյունաբերական, ֆիզիկական բնույթի ալերգածիններ: Օրգանիզմն ալերգածիններին հակազդում է որպես հիվանդության հարուցիչ:
Ալերգիան վկայում է այն մասին, որ մարդու օրգանիզմում ալերգենների քանակն անցել է թույլատերլիի սահմանը, քանի որ օրգանիզմը սկսում է հակամարմին արտադրել օտարածին ալերգենների հետ առաջին իսկ շփումից սկսած: Հետևաբար օրգանիզմը սկսում է ենթարկվել որոշակի խախտումների ու ամենատարբեր ձևով արձագանքել անվնաս թվացող գրգռիչներին:
Ինչպիսի՞ն են ալերգիկ հիվանդությունները. շատ տարածված, առաջին հերթին, և շատ բազմազան՝ արտահայտումով: Լինում են մարմնի ցանավորումով, մարմնի տարբեր հատվածներում այտուցների զարգացումով, հատկապես դեմքի, կոկորդի շրջանում և, առաջացնելով համապատասխան շնչարգելություն, կլման և շնչառական ակտի դժվարացում, արտահայտվում են նաև մաշկի թեփոտումով, քորի զգացողությամբ, մաշկի ճաքճքումով և ավելի խոր վերքերով, կարող է լինել նաև փռշտոց, արցունքահոսություն, քթահոսություն, աչքերի քոր, կոկորդի, ականջների քոր, նաև՝ շնչարգելություն, հազ, հևոց: Նմանատիպ գանգատները բազմազան են և, ցավոք սրտի, անվնաս չեն, որովհետև ամենահասարակ ալերգիայի հիմքում կարող է լինել ավելի լուրջ հիվանդություն՝ կյանքի համար ավելի լուրջ հետևանքներով:
