Doing business 2013-ում Հայաստանը նախորդ տարվա համեմատ միանգամից 18 կետով առաջընթաց գրանցեց՝ հասնելով 32-րդ հորիզոնականին՝ նախորդ տարվա 50-րդ տեղի փոխարեն: Առաջընթացը զգալի է «ներդրումային միջավայր» ենթացուցիչով՝ միանգամից 73 կետով (նախորդ տարվա 98-րդ տեղի համեմատ այս տարի զբաղեցնում ենք 25-րդ տեղը):
«Ցուցանիշները ցուցանիշներով, այնուամենայնիվ, իրական կյանքով է պետք դատել: Ինչ ցուցանիշ հիմա հրապարակվում է, ես լուրջ չեմ վերաբերվում դրան»,- «Առաջին լրատվական»-ի հետ զրույցում հայտարարեց կառվարման փորձագետ Հարություն Մեսրոբյանը՝ պատասխանելով հարցին, թե տնտեսության զարգացման վրա Doing business-ում առաջընթացն ինչ ազդեցություն կունենա:
Նրա կարծիքով՝ օլիգարխիկ տնտեսության մեջ օտարերկրյա ներդրումների մասին պետք է մոռանալ, քանի որ չի կարող նման բան լինել, որ դրսի լուրջ ներդրող գա՝ իմանալով, որ այստեղ մենաշնորհ է տիրում, ինչը նշանակում է՝ այստեղ մենաշնորհային օրենքներ են գործում, ինչն էլ նշանակում է, որ ինքը որպես ներդրող պաշտպանված չէ:
Հարցին՝ միջազգային կառույցներն ասում են, որ որոշ ժամանակային լագից հետո դրա ազդեցությունը կերևա, համաձայն չե՞ք, Հ.Մեսրոբյանը պատասխանեց. «Թվերը մի կողմ, ներդրողը պետք է տեսնի իր պաշտպանվածությունը, իսկ երբ ինքը տեսնում է, որ շահութաբեր ոլորտները մոնոպոլիզացված են, ինքը հասկանում է, որ տնտեսությունն անառողջ է: Լուրջ ներդրող այստեղ չի մտնի: Սպեկուլյանտ կարող է մտնի, օլիգարխների հետ փոխկապակցված մարդիկ կարող է մտնեն, բայց լուրջ ռազմավարական ներդրող չի մտնի երբեք»:
