«Ժառանգության» առաջնորդ Րաֆֆի Հովհաննիսյանը նախօրեին անդրադարձել է նախկին արտգործնախարար Վարդան Օսկանյանի ֆեյսբուքյան գրառմանը, որտեղ նա հերթական անգամ գնահատական էր տվել Հայաստանի ծանր իրավիճակին: Րաֆֆի Հովհաննիսյանը հիշեցրել էր, որ այդ վիճակը ծանր էր նաև Վարդան Օսկանյանի նախարար եղած տարիներին:
Ակնհայտ է, որ «Ժառանգության» առաջնորդը` ի դեմս Վարդան Օսկանյանի, նախագահական թեկնածուների շարքում տեսնում է մրցակցի: Սակայն այստեղ, իհարկե, մեկ այլ ուշագրավ դետալ կա:
Րաֆֆի Հովհաննիսյանը, պատասխանելով Օսկանյանին և նրան հիշեցնելով Ռոբերտ Քոչարյանի իշխանության ժամանակաշրջանը, ըստ էության փորձում է պատասխանել նաև վերջերս հաճախակիացած այն մեղադրանքներին և ենթադրություններին, որոնք նաև մամուլի հրապարակումների տեսքով են եղել, թե նա սկսել է «Բարգավաճ Հայաստան»-ի հետ համագործակցության պլաններ մշակել և մեկնարկ տալ այդ համագործակցությանը: Քննադատելով Վարդան Օսկանյանին, որն այսօր համարվում է «Բարգավաճ Հայաստան»-ի թեկնածուի ամենահավանական հավակնորդը, Րաֆֆի Հովհաննիսյանը կարծես թե փորձում է ցույց տալ, որ ինքը ԲՀԿ-ի հետ խաղ չի սկսում: Իրականում, սակայն, Օսկանյանի հանդեպ քննադատությունը ամենևին էլ չի նշանակում ԲՀԿ-ի քննադատություն:
Վարդան Օսկանյանը ԲՀԿ-ի մի մասն է ընդամենը, ընդ որում` առայժմ երևի թե ավելի շատ փոքր մասը: Իսկ մեծ մասը դեռևս Գագիկ Ծառուկյանն է: Ավելին` Գագիկ Ծառուկյանն այսօր ինչքան էլ նույն խաղն է խաղում Օսկանյան-Քոչարյան տանդեմի հետ, այսուհանդերձ` նաև ունի որոշակի շահերի բախում, քանի որ տանդեմը ստիպում է նրան առավել կոշտ խաղալ Սերժ Սարգսյանի դեմ: Ծառուկյանը դեմ է դրան, ինչն էլ առաջացնում է խնդիր` պահել կուսակցությունը, որ այն ամբողջությամբ չանցնի Քոչարյան-Օսկանյան տանդեմի ձեռքը:
Այս իմաստով Օսկանյանին հարվածելը ամենևին էլ միանշանակ չի ենթադրում հարված Գագիկ Ծառուկյանին: Ավելին` այստեղ Ծառուկյանի համար շահեկան տարրեր կան, քանի որ ինչքան Վարդան Օսկանյանը հարվածներ ստանա քաղաքական դաշտում, այնքան նա Գագիկ Ծառուկյանի կարիքն է զգալու: Այսինքն` ըստ էության, Րաֆֆի Հովհաննիսյանը բարձրացնում է Ծառուկյանի նշանակությունը Վարդան Օսկանյանի համար:
Դժվար է ասել` արդյոք Ծառուկյանը պայքարո՞ւմ է Օսկանյանի հետ թեկնածու առաջադրվելու համար և ուզո՞ւմ է նրա փոխարեն ինքն առաջադրվել, սակայն ակնհայտ է, որ խնդիրը միայն նախագահական ընտրությունները չէ, այլ նաև` կուսակցությունը դրանից հետո պահելու:
Այս իմաստով Րաֆֆի Հովհաննիսյանը միգուցե ոչ միայն չի կարողանում հերքել ԲՀԿ-ի հետ համագործակցության պլանները, այլև նույնիսկ իր ներկայիս հայտարարությամբ վկայում է դրանց հեռահար տարբերակների մասին:
