Այսօր առավոտվանից «Զվարթնոց» կամ «Արմենիա» միջազգային օդանավակայանը դարձյալ դադարեցրել է «Արմավիա» ավիաընկերության չվերթների սպասարկումը: «Արմավիայի» լրատվական ծառայության պատասխանատու Նանա Ավետիսովայի փոխանցմամբ՝ մի քանի չվերթներ հետաձգվել են, և այժմ օդանավակայանի ղեկավարության հետ չվերթները սպասարկելու համար բանակցություններ են ընթանում:
Արդեն մի քանի տարի է, ինչ «Զվարթնոցը» պարբերաբար դադարեցնում Հայաստանի միակ ավիաընկերության չվերթների սպասարկումը այդ ընկերության կուտակած պարտքերի պատճառով: Իսկ վերջին շրջանում «Արմավիան» այդ վիճակում է հայտնվում գրեթե ամեն ամիս:
«Զվարթնոցի» մամլո ծառայության տեղեկացմամբ՝ «Արմավիա»-ի՝ օդանավակայանին ունեցած պարտքն արդեն անցել է 1 մլն դոլարի սահմանը: Պարտքը մարելու համար այդ երկու ընկերությունների միջև կազմվել է ժամանակացույց: Եվ երբ «Արմավիան» ինչ-որ ժամանակահատվածի վճարումը չի հասցնում, օդանավակայանը կասեցնում է այդ ընկերության չվերթների սպասարկումը: Նման յուրաքանչյուր դեպքից հետո «Արմավիան» որոշակի գումար է վճարում, և օդանավակայանը վերսկսում է չվերթների սպասարկումը:
«Արմավիա»-ի սեփականատեր Միխայիլ Բաղդասարովը նախորդ անգամ հայտարարել էր, թե օդանավակայանը թանկացրել է սպասարկման վճարը:
Հայտնի է, որ «Զվարթնոց» օդանավակայանը 2001 թ. 30 տարով հավատարմագրային կառավարման է հանձնվել Էդուարդո Էռնեկյանին: Բայց նաև կարծիք կա, որ այդ գործարքի հիմնական փայատերը նախկին նախագահ Ռոբերտ Քոչարյանն է: Հայտնի է, որ Քոչարյանն իր նախագահության շրջանում և այժմ էլ բավական մտերիմ հարաբերություններ է ունի Էռնեկյանի հետ: Եվ «Զվարթնոցը» նրանց միակ բիզնես-գործընկերությունը չէ:
Հիշեցնենք, որ «Զվարթնոցը» հավատարմագրային կառավարման հանձնվելուց հետո կտրուկ թանկացրեց սպասարկման վարձերը: Նույնիսկ օդանավակայանի տարածքում գործող տաքսի ծառայությունների սպասարկման գները հասան աստղաբաշխական թվերի: Ավելին՝ օդանավակայանի տարածքում գրեթե արգելվում է այլ տաքսի ծառայությունների գործունեությունը:
Կարծիք կա, որ «Արմավիա»-ի ու «Զվարթնոց»-ի այս գործընկերային վեճն իրականում քաղաքական դրդապատճառներ ունի. Քոչարյանը կամ Էռնեկյանն իրենք են ցանկանում գնել այդ ընկերությունը: Վերջերս Մ. Բաղդասարովն էլ չէր բացառել, որ կվաճառի «Արմավիան»: Տեղեկություններ կան, որ «Արմավիա»-ի պոտենցիալ գնորդների շարքում է իտալական ինչ-որ ընկերություն: Հայտնի է, որ 2008 թվականից Էռնեկյանին է պատկանում իտալական Volare Air ընկերությունը: Եվ չի բացառվում, որ «Արմավիա»-ի իտալական գնորդը նույն Էռնեկյանն է:
Հենց այս պարագան էլ կարող է քաղաքականացնել ազգային օդափոխադրողի շուրջ ծավալվող դեպքերը: Այսինքն՝ Էռնեկյանն ու Քոչարյանը ցանկանում են տիրանալ նաև «Արմավիա»-ին և, օգտվելով իրենց մենաշնորհային վիճակից, նրան անընդհատ չվերթները հետաձգելու խնդրի առաջ են կանգնեցնում՝ այդպիսով ստիպելով Մ. Բաղդասարովին ընկերությունը վաճառել իրենց: Իսկ անընդհատ չվերթները հետաձգելով՝ «Արմավիա»-ի արժեքը ժամանակի ընթացքում կարող է ընկնել: Եվ, ի վերջո, գնորդները, «գին գցելով», Հայաստանի հիմնական օդանավակայանի հետ միասին կարողանան տիրանալ նաև մեր ազգային փոխադրողին:
