Ընթացիկ շաբաթն սկսվեց ՀՀ նախկին վարչապետ Հրանտ Բագրատյանի և ՀՀ ֆինանսների նախարար Վաչե Գաբրիելյանի ասուլիսներով:
Հ.Բագրատյանը, մեկնաբանելով այն պաշտոնական հայտարարությունը, թե գազի գինը ՀՀ բնակիչների համար չի թանկանա, իսկ սոցիալապես անապահով խավերի համար նույնիսկ կնվազի, ասաց, թե սա «Հայկական ժամանակ» և «Ժամանակ» թերթերի հրապարակումների շնորհիվ է եղել: Բացի այդ, ըստ Հ.Բագրատյանի, գազի գինը բնակչության համար չբարձրացնելը «Գազպրոմի» շահերից է բխում, քանի որ գնի բարձրացման դեպքում գազի սպառումը (և հետևաբար եկամուտները) էականորեն նվազում են:
Վ.Գաբրիելյանը խոսեց վրացական համարներով մեքենաներ օգտագործողներին մեքենան գրավ դնելու դիմաց 6 ամսով անտոկոս վարկ տրամադրելու կառավարության որոշումից: Նա ամեն կերպ խուսափում էր մեկնաբանել մաքսային օրենսգիրքն ու այն հանգամանքը, թե արդյոք նորմա՞լ է այն, որ ՀՀ-ում մեքենաների մաքսազերծումը մինչև 10 անգամ ավելի թանկ է, քան Վրաստանում:
Ֆինանսների նախարարը, սակայն, չբացառեց, որ կառավարությունը կարող է քննարկումներ նախաձեռնել մաքսային օրենսգրքում փոփոխություններ կատարելու վերաբերյալ:
Շաբաթվա ընթացքում Ազգային վիճակագրական ծառայությունը (ԱՎԾ) հրապարակեց 2011թ. փետրվար ամսվա գների վերաբերյալ տվյալները, որոնց համաձայն, 2011թ. փետրվարին, 2010թ. փետրվարի համեմատ (տասներկուամսյա գնաճ), սպառողական ապրանքների գներն աճել են 12.4%-ով: 1997թ. հետո առաջին անգամ է, որ մեր հանրապետությունում ԱՎԾ-ն այսքան բարձր գնաճ է արձանագրում:
ԱՎԾ մեկ այլ հրապարակման համաձայն` ՀՀ արտաքին պետական պարտքը 30.12.2010թ. դրությամբ կազմել է մոտ 3,3 մլրդ ԱՄՆ դոլար: Նկատենք, որ 2010-ի հունիսին ընդունված «Կառավարության պարտքի կառավարման ռազմավարական ծրագրում» նախատեսված էր, որ 2010թ. վերջին ՀՀ արտաքին պետական պարտքը կկազմի մոտ 3.6 մլրդ դոլար:
Շաբաթվա վերջն էլ աչքի ընկավ www.armhotels.am առաջին ազգային առցանց համակարգի շնորհանդեսով, որին մասնակցեցին ՀՀ վարչապետ Տիգրան Սարգսյանն ու էկոնոմիկայի նախարար Տիգրան Դավթյանը: Այդ համակարգի նպատակն այն է, որպեսզի ցանկացած զբոսաշրջիկ կարողանա հյուրանոցային համարներ պատվիրել Հայաստանում` ինտերնետի միջոցով ծանոթանալով նաև մեր հյուրանոցների վիճակին ու ծառայությունների 90-95%-ին:
Մինչև այս համակարգի ներդրումը ՀՀ-ի 170 հյուրանոցներից միայն 5-ում էր հնարավոր առցանց (ինտերնետի միջոցով) ծանոթանալ ծառայություններին և համարներ պատվիրել:
Այսօր արդեն համակարգին միացված է ՀՀ-ի 106 հյուրանոց, որոնցից 73-ը (այդ թվում` 8-ը ԼՂ-ում) ամբողջությամբ կարողանում են աշխատել առցանց այս համակարգով: Վարչապետն իր խոսքում հատուկ ընդգծեց այս համակարգի ներդրման կարևորությունը ՀՀ-ում տուրիզմը զարգացնելու տեսակետից:
