ИТАР-ТАСС-ի փոխանցմամբ՝ «Բասիջ» ժողովրդական աշխարհազորի ջոկատներն այսօր մտցվել են Թեհրանի կենտրոնական առևտրային թաղամասեր, ուր երեկ գրանցվել են բողոքի ակցիաներ՝ կապված իրանական արժույթի կտրուկ անկման հետ: Բրիտանական ռազմական շրջաններում եղած աղբյուրը հայտնել է, որ Իրանի կառավարությունը ձեռնարկելու է անվտանգության արտակարգ միջոցներ՝ թույլ չտալու համար բողոքի ակցիաների ծավալումը:
Լոնդոնից եկած տեղեկատվության համաձայն՝ անվտանգության ուժերի հետ ամենակատաղի բախումները գրանցվել են Թեհրանի երեք առևտրային փողոցներում, ուր զբաղվում են ոսկեդրամների առևտրով և արտարժույթի փոխանակմամբ: Բախումներն ուղեկցվում են ոստիկանական մեքենաների հրդեհումով:
«Բասիջի» ջոկատների առջև առաջադրանք է դրվել համոզելու միջոցով վերջ դնել բողոքի ակցիաներին և աջակցել բաց խանութներին: Դրա հետ մեկտեղ, իշխանությունները կարգադրել են այդ գործողությունների ժամանակ թույլ չտալ զոհերի գրանցում:
Երեկ ամերիկյան 1 դոլարի փոխարժեքը Իրանի ազատ շուկայում հասել է մինչև 40,000 ռիալի: Ընդամենը մեկ շաբաթ առաջ 1 դոլարը հավասար էր 24,000 ռիալի:
