Հյուսիսատլանտյան դաշինքը Սիրիայից պահանջել է անհապաղ դադարեցնել Թուրքիայի դեմ ցանկացած «ագրեսիվ գործողություն»: Այս մասին հայտնում է Reuters գործակալությունը:
ՆԱՏՕ-ի անդամ երկրների դեսպանները անցած գիշեր արտակարգ հանդիպում են անցկացրել թուրք-սիրիական սահանին տեղի ունեցած միջադեպից հետո: Երեկ երեկոյան Սիրիայի տարածքից արձակված արկերը պայթել են Թուրքիայի տարածքում` խլելով 5 մարդու կյանք: Ի պատասխան` Թուրքիան հարված է հասցրել սիրիական տարածքին, որտեղից արձակվել էր կրակը:
«Դաշինքը շարունակում է աջակցել Թուրքիային ու պահանջում է անհապաղ դադարեցնել ագրեսիայի նման դրսևորումները ՆԱՏՕ-ի ցանկացած դաշնակցի դեմ, և կոչ անում սիրիական ռեժիմին դադարեցնել միջազգային իրավունքի սարսափելի խախտումները»,- դաշինքի անդամ երկրների ներկայացուցիչների համատեղ հայտարարությունն է մեջբերում գործակալությունը:
