Թուրքական Doğan լրատվական գործակալության փոխանցմամբ՝ Սիրիայից արձակված արկը վերստին ընկել է Շանլըուրֆա (Ուրֆա) նահանգի Աքչաքալեի շրջանում: Միջադեպը գրանցվել է այսօր՝ տեղական ժամանակով ժամը 15.30-ին:
Արկն ընկել է բնակելի թաղամասի վրա, ինչի հետևանքով զոհվել է 5 մարդ, վիրավորվել 13 մարդ: Վիրավորների թվում կան նաև երկու ոստիկաններ: Նշվում է, որ Թուրքիային սահմանակից Սիրիայի շրջաններում արդեն երկու շաբաթ է, ինչ կատաղի մարտեր են ընթանում կառավարական բանակի ու ապստամբների միջև: Հենց այդ բախումներից մեկի ժամանակ էլ արձակված արկն ընկել է Թուրքիայի տարածքում:
Հիշեցնենք, որ սեպտեմբերի 28-ին Սիրիայի տարածքից արձակված արկն ընկել էր Աքչաքալեի շրջանում, ինչի հետևանքով թեթև վիրավորվել էր 3 մարդ և ավերվել էին երկու տներ: Դրանից հետո Թուրքիան բողոքի նոտա էր հղել Սիրիային:
