Новости-Грузия-ի փոխանցմամբ՝ «Վրացական երազանք» դաշինքի առաջնորդ, միլիարդատեր Բիձինա Իվանիշվիլին այսօր հայտարարել է, որ «Վրացական երազանքը» նախագահ Միխեիլ Սաակաշվիլիի հրաժարականի պահանջ առաջ չի քաշել.
«Երբ երեկ խոսեցի գործող նախագահի հրաժարականի մասին, ես արտահայտեցի իմ կարծիքը և ոչ թե քաղաքական պահանջ դրեցի կամ վերջնագիր ներկայացրեցի: Ես բազմիցս հայտարարել եմ, որ մենք պատրաստ ենք կառուցողական երկխոսություն գործող իշխանությունների ներկայացուցիչների, այդ թվում` նաև նախագահի հետ: Մենք որևէ քաղաքական վերջնագիր չենք ներկայացնում և հանուն երկրի բարեկեցության պատրաստ ենք երկրի նախագահի հետ երկխոսության»:
Հիշեցնենք, որ երեկ լրագրողների հետ զրույցում Բիձինա Իվանիշվիլին հայտարարել էր, որ նախագահ Սաակաշվիլիի կողմից հաջորդ տրամաբանական և ճիշտ քայլը կլիներ հրաժարական տալը և վաղաժամ նախագահական ընտրություններ նշանակելը՝ ընդգծելով, որ ավելի լավ կլինի, եթե Սաակաշվիլին անձամբ հրաժարական տա, քան նրան իմփիչմենթ հայտնեն:
Վրաստանի Ազգային անվտանգության խորհրդի քարտուղար Գիգա Բոկերիան նախագահ Սաակաշվիլիին ուղղված Բիձինա Իվանիշվիլիի հրաժարականի կոչը որակել էր որպես վտանգավոր խաղ՝ Իվանիշվիլիին հիշեցնելով, որ Վրաստանում նախագահական ընտրությունները տեղի են ունենալու 2013 թվականի հոկտեմբերին:
