Մոսկովյան «Դրախտ» գիշերային ակումբին կարգելեն օգտագործել Վլադիմիր Պուտինի կերպարն իրենց երեկույթի գովազդման համար:
Ինչպես հայտնում է ИТАР-ТАСС գործակալությունը, այս մասին մարտի 2-ին հայտնել է Ռուսաստանի վարչապետի մամլո խոսնակ Դմիտրի Պեսկովը` նշելով, որ կառավարության փաստաբանները պահանջել են պարզաբանել «Putin Party: Хочу премьер-министра» երեկույթի գովազդման մանրամասները:
Պեսկովը մանրամասնել է, որ փաստաբանները պետք է պարզեն` արդյո՞ք խոսքը գնում է Պուտինի կերպարի առևտրային օգտագործման մասին: «Եթե մենք մոտակա օրերին պարզենք, որ խոսքը գնում է այս մասին, ապա օրենքի սահմաններում անհրաժեշտ միջոցները կձեռնարկենք այս անօրինականության վերացման համար»,- հայտնել է մամլո խոսնակը:
Միևնույն ժամանակ Պեսկովը մանրամասնել է, որ կառավարությունն իրավունք չունի պնդել երեկույթի հետաձգումը, սակայն կպահանջի դադարեցնել այն Պուտինի հետ ասոցացնելը:
Տեղեկացնենք, որ «Դրախտ» ակումբը մտադիր է «Putin Party»-ն անցկացնել մարտի 6-ին, Կանանց միջազգային օրվա նախօրյակին: Ակումբի ադմինիստրացիայում պարզաբանել են, որ Վլադիմիր Պուտինի կերպարն ընտրվել է քվեարկության արդյունքում, որն անցկացվել է ակումբի իգական սեռի այցելուների և աշխատակցուհիների շրջանում. իդեալական տղամարդու կերպարի մասին հարցին վարչապետի անունն ամենից շատն է հնչել:
