Ներկայացուցիչների պալատի արտաքին հարցերով հանձնաժողովի անդամ Բրեդ Շերմանը ողջունել է Լեռնային Ղարաբաղի Հանրապետությունում Ստեփանակերտի օդանավակայանի բացումը: ԱՄՆ Հայ դատի հանձնախմբից «Արմենպրես»-ին տեղեկացրել են, որ Շերմանը կոչ է արել Ադրբեջանին չդիմել որևէ ռազմական գործողության և երաշխավորել օդանավերի անվտանգ երթևեկությունը:
Ամերիկացի կոնգրեսականը հորդորել է Ադրբեջանի իշխանությանը զերծ մնալ Արցախի քաղաքացիական օդանավերի ուղղությամբ կրակ բացելու իր սպառնալիքներից, իսկ ԱՄՆ-ի կառավարությանը կոչ է արել անմիջապես նվազեցնել ռազմական հարաբերությունները Ադրբեջանի զինվորականության հետ` զրկելով նրան օգնությունից և զինամթերք փոխանցելուց:
Ամերիկայի Հայ դատի հանձնախումբը ողջունել է կոնգրեսական Շերմանի սկզբունքային դիրքորոշումը` ի պաշտպանություն Արցախի օդանավակայանի բացման «Օդանավակայանի բացումը կենսական կապո կլինի Լեռնային Ղարաբաղի Հանրապետության և աշխարհի միջև, քանի որ Ադրբեջանը շարունակում է 24 տարի շրջափակել Արցախը և անընդմեջ սպառնալիքներ հնչեցնել: Մենք անհամբերությամբ սպասում ենք Ստեփանակերտի օդանավակայանի բացմանը, որը զբոսաշրջության և տնտեսական զարգացման նոր հնարավորություններ կբացի Լեռնային Ղարաբաղի Հանրապետության համար»,- ասված է Հայ դատի գործադիր տնօրեն Արամ Համբարյանի հայտարարության մեջ:
Ստեփանակերտի օդանավակայանը կառուցվել է 1974 թվականին և հիմնականում չվերթներ է ընդունել Երևանից ու Բաքվից: 1992 թվականից օդանավակայանը մատնվել է պարապուրդի: 2008 թվականին սկսվել է օդանավակայանի նոր` գլխավոր մասնաշենքի կառուցումը, որը նման է թևերը բացած արծվի: Այս ընթացքում լայնացվել է նաև թռիչքուղին, ինչպես նաև հարթեցվել են թռիչքուղուն հարակից մի քանի բլուրների գագաթները, որպեսզի հնարավոր դառնա ժամանակակից մեծ ինքնաթիռների ընդունումը:
Ստեփանակերտի օդանավակայանի վերակառուցման և վերազինման աշխատանքների հենց սկզբից Ադրբեջանի իշխանությունները սպառնում էին, որ օդանավակայանի շահագործման դեպքում հարվածելու են քաղաքացիական օդանավերին: Ադրբեջանական այս հայտարարությունները դատապարտեց նաև միջազգային հանրությունը:
