Ճապոնիայի մայրաքաղաքի կենտրոնը, որ սովորաբար հանգստյան օրերին լի էր լինում մարդկանցով և աչքի էր ընկնում աշխուժությամբ, դատարկվել էր մոտեցող թայֆունի` «Ջելավատի» առաջին իսկ նշանների հայտնվելուն պես:
Չնայած օդերևութաբանների կանխատեսումներով սպասվում է, որ թայֆունը միայն գիշերը կհասնի գագաթնակետին, երեկոյան արդեն ռեստորաններում և սրճարաններում գրեթե այցելուներ չկային: Փոխարենը երեկոյան գնացքներն ընթանում էին լեփ-լեցուն ուղևորներով: Ուշացումները, գնացքների ժամանման միջև ընկած երկար ժամանակահատվածները, ինչպես նաև Տոկիոյի արևմտյան որոշ հատվածներում առհասարակ շարժման դադարեցումը մայրաքաղաքում հանգեցրել էր կիրակի երեկոյի համար ոչ բոնրոշ ուղևորների քանակի առկայության:
Այժմ թայֆունի կենտրոնը ճապոնական Հոնսյու կղզում է` Տոկիոյի կենտրոնից 40 կմ արևմուտք: Քամու արագությունը կազմում է վայրկյունում 35-40, որոշ վայրերում` 50 մ: Այն 55 կմ/ժ արագությամբ շարժվում է դեպի հյուսիս-արևելք:
Երկուշաբթի օրը թայֆունն անցնելու է երկրի ամբողջ հյուսիսարևելյան հատվածով:
Ճապոնիայի հարավով «Ջելավատն» անցել է մեկ օր առաջ, ինչի արդյունքում տուժել է ավելի քան 100 մարդ: Չեղյալ է հայտարարվել մոտ 150 թռիչք, դադարեցվել է էլեկտրագնացքների մոտ 170 չվերթ: Ճապոնիայի հարավ-արևելքում հոսանքազրկվել է 37 000 տուն, հարավում ավելի շատ` 90 000:
