Այսօր Գուրգեն Մարգարյանը կլիներ 34 տարեկան: Այդ կապակցությամբ ԵՊՀ Երիտասարդ համալսարանականների միավորման (ԵՀՄ), Երկրապահ կամավորականների միության և «Գուրգեն Մարգարյան» հասարակական կազմակերպության ջանքերով «Եռաբլուր » պանթեոնում կազմակերպվել էր երթ:
ԵՀՄ նախագահ Գևորգ Մելքոնյանը «Առաջին լրատվական»-ի հետ զրույցում նշեց, որ Գուրգեն Մարգարյանի հիշատակին նվիրված երթն արդեն ավանդական է դարձել երիտասարդ համալսարանականների կողմից. «Երթի նպատակն է, որպեսզի երիտասարդները հիշեն այն հայերին, ովքեր զոհ են գնացել Ադրբեջանի կողմից իրականացվող պետական հակահայկական քաղաքականությանը: Սա լոկ մեկ մարդասպանություն չէ, սա ուղղված է ողջ հայության դեմ»:
Գևորգ Մելքոնյանը հավելեց, որ երթը նաև նպատակ ունի ևս մեկ անգամ երիտասարդներին համախմբել ազգային կարևոր հարցերի շուրջ. «Երթի մասնակիցներից բոլորը գիտակցում էին, որ իրենցից յուրաքանչյուրը կարող էր լինել Գուրգեն Մարգարյանի փոխարեն և կարող էր զոհ գնալ հակահայկական քարոզչությանը: Սրանով մենք ցանկանում ենք մեր բողոքի ձայնը բարձրացնել ընդդեմ ադրբեջանա-հունգարական գործարքի»:
