Ֆրանսիայի Սահմանադրական դատարանը սեպտեմբերի 21-ին հրաժարվել է երկրի հարավում կորիդան արգելելուց` հայտարարելով, որ դա հակասում է օրենքին, հաղորդում է Agence France-Presse-ը:
Ցլամարտերը դադարեցնելու պահանջով դատարան էին դիմել կենդանիների պաշտպանները` բողոքարկելով կենդանիների հետ դաժանաբար վարվելու դեմ քրեական պատասխանատվության ենթարկելու մասին ֆրանսիական օրենքը:
Կորիդան, որ արգելված է Ֆրանսիայի այլ շրջաններում, հարավում դեռևս շարունակում է պահպանվել` որպես ավանդական մշակույթի երևույթ և զբոսաշրջիկներին հրապուրելու միջոց:
Գործակալության տվյալներով` յուրաքանչյուր տարի մարտերի արդյունքում սպանվում է ավելի քան 1000 ցուլ:
Ավելի վաղ ի պաշտպանություն կորիդայի հանդես էր եկել Ֆրանսիայի ներքին գործերի նախարարը` նշելով, որ դա այն ավանդույթն է, որը պետք է պահպանել: Կորիդայի պաշտպանների մյուս փաստարկը վերաբերում էր այն լուրջ վնասներին, որ կարող էր կրել Ֆրանսիայի տնտեսությունը:
Այնուամենայնիվ, կենդանիների պաշտպանները հայտարարել են Եվրոպական դատարան դիմելու իրենց մտադրության մասին:
