Ադրբեջանական APA լրատվական գործակալության փոխանցմամբ՝ Ադրբեջանի նախագահ Իլհամ Ալիևը ֆրանսիացի գործարարների հետ հանդիպման ժամանակ հայտարարել է, որ Առևտրի համաշխարհային կազմակերպությանը (ԱՀԿ) Ադրբեջանի անդամակցությունը, ամենայն հավանականությամբ, տեղի չի ունենա մոտ ապագայում.
«Ադրբեջանն աշխատում է այդ ուղղությամբ և տվյալ հարցով խորհրդակցություններ է անցկացնում գործընկեր երկրների հետ: Գոյություն ունի երկու կարծիք, թե երբ Ադրբեջանը կանդամակցի ԱՀԿ-ին: Առաջինի դեպքում դա տեղի կունենա հնարավորինս արագ: Սա նույնպես հիմնավորված կարծիք է, քանի որ դա շուկայում կբարձրացնի մրցունակությունը: Մենք հուսով ենք, որ դա դրական ազդեցություն կունենա սպառողական գների վրա:
Մյուս կողմից էլ ԱՀԿ-ին անդամակցելը կարող է արգելակել ոչ նավթային հատվածի՝ գյուղատնտեսության, փոքր և միջին ձեռնարկությունների զարգացումը, քանի որ այսօր մենք լուրջ աշխատանքներ ենք տանում տնտեսության դիվերսիֆիկացման ուղղությամբ: Մենք ունենք անհատական ձեռնարկատիրության խրախուսման պետական ծրագիր:
Մինչդեռ եթե այսօր Ադրբեջանն անդամակցի ԱՀԿ-ին, ապա դա կարող է բացասական հետևանքներ ունենալ գյուղատնտեսության ու ձեռնարկատիրության վրա: Դա կարող է որոշակի խնդիրներ առաջացնել՝ կապված զբաղվածության հետ: Մեր մի շարք ապրանքներ կարող են կորցնել իրենց մրցունակությունը: Մենք փորձում ենք գտնել այս երկու մոտեցումների միջինը: Ամենայն հավանականությամբ, ԱՀԿ-ին Ադրբեջանի անդամակցությունը տեղի չի ունենա մոտ ապագայում»:
