Այսօր միջազգային ներդրումային «Սոչի 2012» համաժողովի ժամանակ ՌԴ տնտեսական զարգացման նախարար Անդրեյ Բելոուսովը հայտարարել է, որ ՌԴ-ն կարող է սահմանափակումներ մտցնել ցորենի արտահանումների վրա, եթե գների աճի միտումները պահպանվեն: Նա չի բացառել, որ նման որոշում կարող է ընդունվել արդեն այս աշնանը:
Սակայն, ինչպես «Առաջին լրատվական»-ին հայտնեց ՀՀ ցորեն ներկրող «Մանանա Գրեյն» ՍՊԸ տնօրեն Գուրգեն Նիկողոսյանը, Ռուսաստանը դժվար թե արգելք դնի ցորենի արտահանման վրա, քանի որ արդեն ԱՀԿ անդամ է, և եթե դնեն՝ պետք է տուգանք վճարեն. «Եթե պատրաստ են տուգանվել՝ թող սահմանեն էմբարգո»:
Գ. Նիկողոսյանը հայտարարեց, որ եթե նույնիսկ Ռուսաստանը էմբարգո հայտարարի, Հայաստանը ցորեն ներկրելու խնդիր չի ունենա: Ըստ նրա՝ այսօր խնդիրն այն է, որ ցորենի գներն են բարձրանում, թեև թանկությունն ինչքան հնարավոր է՝ զսպվել է: «Տարին դուրս կգա, նորմալ կլինի: Հացի խնդիր չի լինի Հայաստանում»,- վստահեցրեց Նիկողոսյանը:
Նա նշեց, որ Հայաստանն արդեն նման փորձ ունեցել է, և մեզ համար ցորեն ներկրելու համար այլընտրանքային աղբյուր են սևծովյան մյուս երկրները՝ Ռումինիան, Բուլղարիան, իսկ եթե դրանք էլ չլինեն, ապա Կանադան ու ԱՄՆ «կան ու կան»:
Գ. Նիկողոսյանը նաև հայտնեց, որ ցորենի գներն են բարձր, իսկ Ռուսաստանի գներն էլ էժան չեն ամերիկյան կամ մյուս երկրների գներից. «Ամբողջ աշխարհում հավասար գներ են: Իսկ նման հայտարարությունները միանգամից բարձրացնում են գները, յուրաքանչյուրը՝ 10 դոլարով: Առանց այդ էլ արդեն շատ բարձր են: Անցած տարի ցորենի ամենաէժան գինը 1 տոննան 230 դոլար էր, հիմա 320 դոլարից պակաս չկա, այսինքն, 90 դոլարով թանկացել է: Իսկ ֆյուչերսային շուկայում նոյեմբերի բարձումներն արդեն 350 դոլար են»:
Հիշեցնենք, որ նախորդ անգամ Ռուսաստանը ցորենի արտահանումներն արգելել էր 2010 թ.՝ երաշտի հետևանքով բերքի սղության պատճառով: Էմբարգոն վերացվեց միայն 2011 թ. հուլիսի 1-ին: Իսկ ԱՀԿ անդամ Ռուսաստանը դարձել է այս տարվա օգոստոսին:
